TOSHKENT, 26-yanvar. /“Dunyo” AA/. Xitoyning Sichuan provinsiyasi Szyaszyan uyezdidan Toshkentga umumiy og‘irligi 300 tonna bo‘lgan yuqori sifatli ko‘k choy ortilgan 10 ta yuk mashinasi yo‘lga chiqdi, deb xabar bermoqda “Dunyo” AA muxbiri.

Xitoyning “Sinxua” axborot agentligi maʼlumotlariga ko‘ra, bu Sichuan provinsiyasi tomonidan 2026-yilda eksportga jo‘natilgan choyning birinchi partiyasidir.

Yuk mashinalari Shinjon-Uyg‘ur avtonom tumanidagi nazorat-o‘tkazish punkti orqali davlat chegarasini kesib o‘tadi, so‘ngra Xitoy–Qirg‘iziston–O‘zbekiston yo‘nalishi bo‘yicha Toshkentga yetib boradi.

Agentlikning taʼkidlashicha, so‘nggi yillarda Szyaszyan hududida choy sanoatining ishlab chiqarish tuzilmasini eksportga yo‘naltirilgan holda o‘zgartirish faol amalga oshirilmoqda. 2025-yilda Szyaszyan uyezdidan eksportga yetkazib berilgan choyning umumiy hajmi qiymat jihatidan taxminan 29 million AQSh dollarini tashkil etdi.

Bundan tashqari, uyezd Sichuan provinsiyasi uchun O‘zbekistondagi birinchi chet el choy omborini yaratdi va uning yetkazib berish geografiyasi dunyoning 20 ga yaqin mamlakatlari va mintaqalariga, jumladan, Rossiya, Marokash va boshqa davlatlarga tegishli.

Eslatib o‘tamiz, 2025-yil yakunlariga ko‘ra, O‘zbekistonning Xitoy bilan tashqi savdo aylanmasi 17,2 milliard dollardan oshdi. Xitoyning O‘zbekiston tashqi savdosidagi ulushi 21,2 foizni tashkil etdi.