Istanbul shahrida Turkiy davlatlar tashkiloti Tashqi ishlar vazirlari kengashining norasmiy yig‘ilishi doirasida O‘zbekiston Respublikasi tashqi ishlar vaziri Baxtiyor Saidov Turkiya tashqi ishlar vaziri Hakan Fidan bilan uchrashdi.

Uchrashuv davomida tomonlar Yaqin Sharqdagi vaziyat hamda uning mintaqaviy oqibatlari yuzasidan fikr almashdilar.

Tomonlar mintaqada tinchlik va barqarorlikni ta’minlash manfaatlari yo‘lida mavjud ziddiyatlarni muloqot va diplomatiya orqali hal etish muhimligini ta’kidladilar.

Shuningdek, joriy yil yanvar oyida O‘zbekiston va Turkiya Prezidentlari hamraisligida o‘tkazilgan Oliy darajadagi strategik hamkorlik kengashining to‘rtinchi yig‘ilishida erishilgan kelishuvlarni to‘liq amalga oshirishga qat’iy tayyorlik bildirildi.