PEKIN, 28-dekabr. /“Dunyo” AA/. XXR Davlat kengashi huzuridagi Yevropa va Osiyo ijtimoiy rivojlanish instituti Ilmiy kengashi rahbari Li Yunsyuan O‘zbekiston xalqini kirib kelayotgan yangi yil bayrami bilan qutladi:

– Butun O‘zbekiston xalqini yaqinlashayotgan Yangi yil bayrami bilan samimiy muborakbod etaman!

O‘ylaymanki, 2026-yil ham Xitoy va O‘zbekiston o‘rtasidagi do‘stlik va sheriklik munosabatlari yana-da rivojlanib, yangi-yangi loyihalar amalga oshiriladi.

O‘tayotgan yilga nazar tashlar ekanmiz, mamlakatingiz “O‘zbekiston – 2030” strategiyasini amalga oshirishda ulkan yutuqlarni qo‘lga kiritganiga guvoh bo‘lamiz.

O‘zbekistondagi islohotlar jarayonini doimiy ravishda kuzatib boraman. Davlatingizda tom maʼnoda – aql bovar qilmas yangilik va o‘zgarishlar ro‘y bermoqda. Xalq manfaatlariga yo‘naltirilgan, insonparvarlik ruhi bilan yo‘g‘rilgan islohotlar aholi turmush tarzining yanada yuksalishi, mamlakat obodligi va taraqqiyotida muhim ahamiyat kasb etmoqda.

Kelajakka nazar tashlab, ishonch bilan ayta olamanki, Xitoy va O‘zbekiston o‘rtasidagi ikki tomonlama hamkorlik aloqalari yana-da kengaytirilib, birgalikda tashabbuslar amalga oshirilsa, yutuqlarimiz bundan-da yuksak bo‘ladi.