Samarqand birinchi “O‘zbekiston – Kanada” parlamentlararo forumiga mezbonlik qiladi
Yanvar 27, 2026. 11:37 • 43 soniya
• 166
TOSHKENT, 27-yanvar. /“Dunyo” AA/. O‘zbekiston Oliy Majlisi Senati raisining birinchi o‘rinbosari Sodiq Safoyev kecha Kanada Parlamenti Jamoalar palatasidagi “Kanada–O‘zbekiston” do‘stlik guruhi raisi Ziyad Abualtaif bilan videokonferensaloqa shaklida uchrashuv o‘tkazdi, deb xabar bermoqda “Dunyo” AA muxbiri.
Senat maʼlumotiga ko‘ra, muzokaralar chog‘ida O‘zbekiston va Kanada o‘rtasidagi parlamentlararo hamkorlikni izchil rivojlantirish va mustahkamlash bo‘yicha tomonlarning o‘zaro manfaatdorligi qayd etildi.
O‘zbekiston Oliy Majlisi delegatsiyasining 2025-yil 26–27-noyabr kunlari Kanadaga tashrifi hamda Kanada parlamentida O‘zbekiston kunining muvaffaqiyatli o‘tkazilgani yuqori baholandi.
“O‘zbekiston – Kanada” birinchi parlamentlararo forumini 2026-yilda Samarqand shahrida o‘tkazish masalasi muhokama qilindi. Shuningdek, Kanada delegatsiyasining mamlakatimizga tashrifi doirasida savdo-investitsiyaviy hamkorlik, jumladan muhim minerallar, qishloq xo‘jaligi, toza energetika, taʼlim va innovatsiyalar sohalarida qo‘shma “O‘zbekiston – Kanada” biznes forumini o‘tkazish masalasi ko‘rib chiqildi.
Uchrashuv yakunida tomonlar O‘zbekiston va Kanada o‘rtasidagi parlamentlararo muloqotni rivojlantirish yo‘lida hamkorlikni yanada chuqurlashtirishga tayyor ekanliklarini taʼkidladi.
Telegram kanalimizga obuna bo‘ling
Barcha yangiliklar va yangilanishlardan birinchi bo‘lib xabardor bo‘ling!
Barchasi
