VASHINGTON-TЕHRON, 11-iyun. /“Dunyo” AA/. Donald Tramp mamlakatga “qattiq zarbalar” berilishini e’lon qilganidan so‘ng AQSH tomonidan amalga oshirilgan so‘nggi zarbalar uchun qasos sifatida Eron Fors ko‘rfazi mintaqasidagi Amerika bazalariga hujum qildi, deya xabar bermoqda “Dunyo” AA muxbiri “Reuters” agentligiga tayanib.

AQSH Markaziy qo‘mondonligi (CENTCOM) Prezident Donald Tramp Tehron urushni to‘xtatish uchun “kelishuvni imzolashni juda uzoqqa cho‘zganini” aytganidan so‘ng, kechasi amalga oshirilgan “mudofaa zarbalari”ning ikkinchi kuni yakunlanganini ma’lum qildi. Bunga javoban Eron bir kun avvalgi javob hujumlariga uchragan Bahrayn va Quvaytdagi Amerika harbiy bazalariga zarba berganini e’lon qildi.

Amerikaning so‘nggi zarbasidan so‘ng Eron janubidagi Hurmuz bo‘g‘ozi yaqinidagi shaharlarda portlashlar eshitildi. Amerika kuchlari avvalgi hujumlar to‘lqinida ham ushbu hududdagi havo hujumidan mudofaa obyektlari, radiolokatsiya stansiyalari va boshqa nishonlarga zarbalar bergan edi.

So‘nggi keskinlashuv chog‘ida Islom inqilobi posbonlari korpusi (IIPK) Hurmuz bo‘g‘ozidan o‘tayotgan ikkita neft tankeriga zarba berganini ham ma’lum qildi. Biroq o‘sha vaqtda bu ma’lumotning mustaqil tasdig‘i bo‘lmagan. Bu voqea Eron davlat ommaviy axborot vositalari Hurmuz bo‘g‘ozi “barcha turdagi kemalar uchun to‘liq yopilgani” haqida xabar tarqatganidan so‘ng yuz berdi. Ayni paytda CENTCOM “tijoriy kemalar bo‘g‘oz orqali har ikki yo‘nalishda harakatlanishda davom etayotganini” bildirdi.

AQSH Prezidenti, agar tinchlik kelishuviga erishilmasa, Eronga yana zarba berilishini qo‘shimcha qildi.

Eron Prezidenti Mas’ud Pezeshkiyon esa mamlakat “har qanday bosim yoki tahdidlarga qat’iy qarshi turishini” ta’kidladi. Avvalroq, Eron Tashqi ishlar vazirligi AQSHni “yuborayotgan ziddiyatli signallari bilan diplomatik jarayonga putur yetkazayotganlikda” ayblagan edi.

Eslatib o‘tamiz, aprel oyida AQSH va Eron dastlab ikki hafta amal qilishi kerak bo‘lgan o‘t ochishni to‘xtatish to‘g‘risida kelishib olgan edi. O‘shandan beri tomonlar keng ko‘lamli jangovar harakatlarga qaytmagan holda, vaqti-vaqti bilan o‘zaro zarbalar almashib turdi.

Biroq, Vashington va Tehron o‘rtasida muzokaralar tashkil etishga qaratilgan so‘nggi urinishlar boshi berk ko‘chaga kirib qoldi va hujumlar shiddati oshdi. Ayni paytda Eron, Iroq, Suriya va Quvaytning havo hududi yopiq. Mintaqaning boshqa mamlakatlarida ham cheklovlar joriy etilishi ehtimoldan xoli emas.

“AP” agentligi surati