TOKIO, 14-noyabr. /“Dunyo” AA/. Tokio shahrida Toshkent viloyati hokimi Zoyir Mirzayev boshchiligidagi delegatsiyaning Yaponiyaning “SYSKO Inc.” va “Shinmei Holdings Co., Ltd.” kompaniyalari rahbariyati bilan muzokaralari bo‘lib o‘tdi, deb xabar bermoqda “Dunyo” AA muxbiri.

“SYSKO Inc.” kompaniyasi rahbari Ken’iti Yamada bilan o‘tkazilgan uchrashuvda elektr energiyasi ta’minotida uzilishlar kuzatilganda korxonalar va ijtimoiy ahamiyatga molik obyektlarning uzluksiz ishlashini ta’minlaydigan avtonom energiya ta’minoti tizimlarini joriy etish masalalari muhokama qilindi.

Kompaniya tomonidan 100 kVt quvvatga ega generator va 100 kVt·soat sig‘imli akkumulyator bilan jihozlangan 20 funtlik konteynerdagi qurilma taqdim etildi. Elektr energiyasi ta’minotida uzilishlar kuzatiladigan Toshkent viloyatidagi obyektlardan birida mazkur qurilmani olti oylik sinovdan o‘tkazish taklif qilindi.

Sinovlar muvaffaqiyatli o‘tgan taqdirda, ushbu texnologiyani boshqa sanoat va ijtimoiy obyektlarga ham tatbiq etish, shuningdek, mintaqada konteynerli energetika tizimlarini yig‘ish va ularga xizmat ko‘rsatish markazini tashkil etish istiqbollari ko‘rib chiqilmoqda.

Raqamli texnologiyalar va sun’iy intellektni rivojlantirishga ham alohida e’tibor qaratildi. Xususan, mahalliy oliy o‘quv yurtlari talablari va yosh dasturchilar uchun istiqbolli loyiha mualliflarini yaponiyalik kompaniyaning startap dasturlariga keyinchalik jalb etgan holda onlayn o‘quv dasturini tashkil etish taklif qilindi.

Bundan tashqari, videokonferensiya formatida “Shinmei Holdings Co., Ltd.” prezidenti Fudzio Misuo bilan muzokaralar o‘tkazildi. Tomonlar Toshkent viloyatida qishloq xo‘jaligi mahsulotlarini qayta ishlash va qadoqlash hamda keyinchalik ularni Yaponiyaga eksport qilish, shuningdek, mintaqaga mashhur yapon restoran brendlari — “Genki Sushi” va “Uobei”ni jalb etish imkoniyatlarini muhokama qildilar.

Uchrashuvlar yakunida tomonlar bildirilgan tashabbuslarni qo‘shimcha ravishda o‘rganib chiqish, ularning texnik va iqtisodiy samaradorligini baholash hamda istiqbolli qo‘shma loyihalar ustidagi ishlarni davom ettirishga kelishib oldilar.