DUSHANBE, 16-dekabr. /“Dunyo” AA/. Abulqosim Loxuti nomidagi Tojikiston Akademik drama teatrida Surxondaryo viloyati akademik drama teatri vakillari tomonidan sahnalashtirilgan “Makr va muhabbat” spektakli namoyish qilindi, deb xabar bermoqda “Dunyo” AA muxbiri.

Surxondaryolik sanʼatkorlarning Tojikistonga uyushtirilgan gastroli doirasida turli tadbir va uchrashuvlar tashkil etildi. Unda o‘zbek diaspora vakillari, talabalar hamda tojikistonlik sanʼat va madaniyat sohasi vakillari ishtirok etdi.

Fridrix Shiller asari asosida sahnalashtirilgan spektakl tomoshabinlarda katta taassurot qoldirdi.

Spektakl so‘nggida Tojikiston hamda Surxondaryo viloyati akademik drama teatri rahbarlari va ijodkorlari so‘zga chiqib, ikki davlat rahbarlari tomonidan olib borilayotgan do‘stona siyosat xalqlarning yaqinlashuviga xizmat qilayotganini taʼkidladi.