BUDAPESHT, 1-noyabr. /“Dunyo” AA/. O‘zbekiston elchixonasi ko‘magida Toshkent arxitektura-qurilish universiteti va Vengriyaning Ishtvan Secheni universiteti o‘rtasida onlayn-muzokaralar o‘tkazildi, deb xabar bermoqda “Dunyo” AA muxbiri.

Uchrashuv chog‘ida tomonlar arxitektura, qurilish, muhandislik va ta’lim sohalaridagi hamkorlikni rivojlantirish istiqbollari hamda qo‘shma ilmiy-ta’lim tashabbuslarini amalga oshirish imkoniyatlarini muhokama qildilar.

Muzokaralar yakunida o‘zaro anglashuv memorandumini imzolash, talabalar va o‘qituvchilar akademik mobilligini rivojlantirish, shuningdek, qo‘shma ta’lim dasturlarini bosqichma-bosqich amalga oshirish yuzasidan kelishuvga erishildi.

Tomonlar erishilgan kelishuvlarning amaliy ijrosini ta’minlash maqsadida muntazam oliygohlararo aloqalarni davom ettirishga kelishib oldilar.