VENA, 24-yanvar. /“Dunyo” AA/. BMTning Giyohvand moddalar va jinoyatchilik bo‘yicha boshqarmasi 2025-yilning ikkinchi yarmidagi faoliyati bo‘yicha yakuniy axborot sharhini taqdim etdi, deb xabar qilmoqda “Dunyo” AA muxbiri.

Diplomatik missiya nomiga BMTning Narkotiklar va jinoyatchilik bo‘yicha boshqarmasi (UNODC) rahbar organlari kotibiyatidan Narkotik vositalar bo‘yicha komissiya (CND) hamda Jinoyatchilikning oldini olish va jinoiy adliya bo‘yicha komissiya (CCPCJ) faoliyatiga bag‘ishlangan axborot byulleteni kelib tushdi.

Taqdim etilgan materiallarda ikkala Komissiyaning 2025 yil iyuldan dekabrgacha bo‘lgan davrdagi faoliyati natijalari umumlashtirilgan. Hujjatlarda giyohvand moddalarni nazorat qilish va jinoiy adliya tizimini mustahkamlash bo‘yicha xalqaro strategiyalarni amalga oshirishga alohida eʼtibor qaratilgan.

Nashr etilgan sharhda global tahdidlarga qarshi kurashish bo‘yicha xalqaro saʼy-harakatlar batafsil bayon etilgan. Xalqaro muloqotning faol ishtirokchisi sifatida O‘zbekiston uchun taqdim etilgan maʼlumotlar strategik ahamiyatga ega.

Byulletenning asosiy mazmuni 2019-yilgi tashkilot deklaratsiyasini amalga oshirish bo‘yicha global saʼy-harakatlarni ko‘rib chiqish va 2026-yilgi xalqaro forumlarga tayyorgarlik ko‘rishga qaratilgan. CND qismida yangi psixoaktiv moddalarning paydo bo‘lishi haqida erta ogohlantirish va giyohvandlikni davolashning ilmiy asoslangan usullaridan foydalanish imkoniyatini kengaytirish muhimligi taʼkidlanadi.

CCPCJ diqqat markazida Kioto deklaratsiyasini amalga oshirishdagi yutuqlar, kiberjinoyatchilik masalalari va jinoyat qurbonlari huquqlarini himoya qilish bo‘yicha chora-tadbirlarni takomillashtirish ko‘zda tutilgan.

Materiallarda sessiyalararo tadbirlar tahlili alohida o‘rin tutadi. Unda aʼzo davlatlar BMTning Barqaror rivojlanish maqsadlarini jinoiy odil sudlov siyosatiga integratsiya qilishni muhokama qilgan.

Hujjatda Toshkentning mintaqaviy xavfsizlikni mustahkamlashdagi konstruktiv roli alohida qayd etilgan. Xususan, BMT ekspertlari sintetik narkotiklarning yangi turlari tarqalishiga qarshi kurashish uchun Markaziy Osiyo mamlakatlari o‘rtasida tezkor axborot almashinuvi samaradorligini taʼkidlagan. Bu ishlar O‘zbekiston Prezidentining mintaqaviy barqarorlikni taʼminlash, aholi salomatligini asrash borasidagi tashabbuslariga to‘la mos keladi.

Jinoyatchilikning oldini olish sohasida 2026-yilgi sessiyalarga tayyorgarlik ko‘rishga eʼtibor qaratilib, unda sud tizimini raqamlashtirish va ichki ishlar organlarini isloh qilish bo‘yicha O‘zbekiston tajribasi jahon amaliyotiga qo‘shilgan muhim hissa sifatida eʼtirof etildi.

BMT Giyohvand moddalar va jinoyatchilik bo‘yicha boshqarmasining boshqaruv organlari bilan muntazam hamkorligi O‘zbekistonga nafaqat milliy qonunchilikka eng yaxshi jahon standartlarini joriy etish, balki BMTning global maydonida mintaqaviy tashabbuslarni faol ilgari surish imkonini beradi.