MINSK, 20-sentabr. /“Dunyo” AA/. Belarus poytaxtida Korrupsiyaga qarshi kurash bo‘yicha Davlatlararo kengashning XI yig‘ilishi bo‘lib o‘tdi, deb xabar bermoqda “Dunyo” AA muxbiri.

Tadbirda O‘zbekiston, Belarus, Rossiya, Qozog‘iston, Qirg‘iziston, Tojikiston va MDH Ijroiya qo‘mitasi vakillari ishtirok etdi. 

Yig‘ilishda noqonuniy orttirilgan aktivlarni qaytarish, qonunchilikni korrupsiyaga qarshi ekspertizadan o‘tkazish, raqamlashtirish va mutaxassislar tayyorlash masalalari muhokama qilindi.

O‘zbekiston delegatsiyasiga Korrupsiyaga qarshi kurashish agentligi direktori Akmal Burxanov boshchilik qildi. Tashrif doirasida Rossiya Bosh prokuraturasi bilan 2027–2028-yillarga mo‘ljallangan hamkorlik dasturi imzolandi. 

Ushbu hujjat korrupsiyaning oldini olish bo‘yicha tajriba almashish, korrupsiyaviy xavflarni aniqlashda raqamli texnologiyalardan foydalanish, korrupsiyaga qarshi madaniyatni rivojlantirish hamda ta’lim loyihalarini yo‘lga qo‘yishni nazarda tutadi.

Hamkorlikning dastlabki tadbirlaridan birini raqamli texnologiyalarning korrupsiyaga qarshi kurashdagi imkoniyatlariga bag‘ishlash rejalashtirilgan.

Yig‘ilishda mutaxassislar tayyorlash masalasiga ham alohida e’tibor qaratildi. MDH Ijroiya qo‘mitasi O‘zbekiston Huquqni muhofaza qilish akademiyasiga korrupsiyaga qarshi kurash sohasida ta’lim beruvchi MDH tayanch tashkiloti maqomini berish masalasini ko‘rib chiqishni qo‘llab-quvvatladi.

O‘zbekistonning xalqaro maydondagi ishtiroki kelgusi yilda yanada kengayadi. 2027-yilda mamlakat BMTning Korrupsiyaga qarshi konvensiyasi bo‘yicha konferensiyasining 12-sessiyasiga mezbonlik qiladi. Minskdagi uchrashuvda Rossiya tomoni ham O‘zbekistonning korrupsiyaga qarshi xalqaro hamkorlikdagi faolligini alohida qayd etdi.