TOKIO, 1-noyabr. /“Dunyo” AA/. O‘zbekiston diplomatlari Yaponiya xalqaro hamkorlik agentligining (JICA) Markaziy Osiyo davlatlari bo‘yicha ijrochi direktori Fusato Tanaka bilan uchrashuv o‘tkazdi, deb xabar bermoqda “Dunyo” AA muxbiri.

Muloqot chog‘ida qo‘shma loyihalarni amalga oshirish jarayoni, ularni bajarishning dolzarb masalalari va hamkorlikni kengaytirish istiqbollari muhokama qilindi. Uchrashuvda O‘zbekiston va JICA o‘rtasidagi amaliy sheriklikni mustahkamlashga qaratilgan yangi taklif va tashabbuslarga alohida e’tibor qaratildi.

Xususan, O‘zbekiston elchixonasi tomonidan “Yangi Toshkent” shahrini barpo etish loyihasiga yaponiyalik hamkorlarni jalb etish, o‘zbek qishloq xo‘jaligi mahsulotlarini Yaponiya bozoriga yetkazib berishni ta’minlash uchun kadrlar tayyorlash va ularning malakasini oshirish dasturini ishlab chiqish taklif qilindi. Shuningdek, transport-logistika infratuzilmasini rivojlantirish hamda sog‘liqni saqlash sohasidagi hamkorlikni kengaytirish masalalari muhokama qilindi.

Tomonlar istiqbolli yo‘nalishlar yuzasidan fikr almashib, O‘zbekistonning ijtimoiy-iqtisodiy taraqqiyotga xizmat qiladigan qo‘shma loyihalarni amalga oshirish va yangi tashabbuslarni ilgari surish muhimligini ta’kidladilar.