TOSHKENT, 22-yanvar. /“Dunyo” AA/. 19-20-yanvar kunlari Jahon iqtisodiyoti va diplomatiya universitetida O‘zbekistonning xorijdagi diplomatik vakolatxonalari rahbarlari uchun ikki kunlik o‘quv seminari tashkil etildi, deb xabar bermoqda “Dunyo” AA muxbiri.

Tadbir diplomatlarning kasbiy malakasini oshirish, shuningdek, zamonaviy tashqi siyosat, xalqaro munosabatlar va parlament diplomatiyasining dolzarb masalalarini muhokama qilishga qaratildi.

Seminarda elchi, siyosiy fanlar doktori, professor Alisher Fayzullayev “Zamonaviy diplomatik muzokaralar” mavzusida maʼruza qilib, xalqaro tizim transformatsiyasi sharoitida diplomatik muzokaralar olib borishning asosiy yondashuvlari va amaliy jihatlarini yoritib berdi.

So‘ngra iqtisod fanlari doktori, professor Nishanbay Sirojiddinov “O‘zbekiston zamonaviy global va mintaqaviy integratsiya jarayonlarida” mavzusidagi maʼruzasini taqdim etdi. U o‘z nutqida iqtisodiy diplomatiya va mamlakatning xalqaro integratsiya formatlaridagi ishtirokiga alohida eʼtibor qaratdi.

Seminarning ikkinchi kunidagi dastur tashqi siyosatning tahliliy va strategik masalalariga bag‘ishlandi. Siyosatshunoslik kafedrasi dotsenti Rustam Mahmudov “Zamonaviy xalqaro munosabatlarni strategik tahlil qilish metodologiyasi” mavzusida maʼruza o‘qidi. Unda strategik fikrlash va xalqaro jarayonlarni bashorat qilish usullari batafsil ko‘rib chiqildi.

“El-yurt umidi” jamg‘armasi ijrochi direktori, professor Gulnoza Ismoilova jamg‘armaning xalqaro hamkorlik istiqbollari mavzusini taqdim etib, uning yuqori malakali kadrlar tayyorlash va inson kapitalini rivojlantirishdagi ahamiyatini alohida taʼkidladi.

Dasturda O‘zbekiston Senati raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyevning maʼruzalari muhim o‘rin egalladi. U o‘z nutqida Prezidenti Shavkat Mirziyoyevning Oliy Majlis va O‘zbekiston xalqiga Murojaatnomasiga batafsil to‘xtalib o‘tdi, shuningdek, mamlakatimiz tashqi siyosatining ustuvor yo‘nalishlarini atroflicha yoritib berdi. Alohida maʼruza zamonaviy xalqaro munosabatlarda parlament diplomatiyasining o‘rni va o‘ziga xos xususiyatlariga bag‘ishlandi.

Mazkur seminar professional fikr almashish, diplomatik korpusning tahliliy ko‘nikmalarini mustahkamlash va O‘zbekistonning tashqi siyosat sohasidagi ustuvor yo‘nalishlarini amalga oshirish bo‘yicha yagona yondashuvlarni ishlab chiqish uchun muhim maydonga aylandi.