VARSHAVA, 7-iyun. /“Dunyo” AA/. O‘zbekiston elchixonasi diplomatlari Polshaning “Pavimental z o.o.” kompaniyasi bosh direktori Fabritsio Paysio bilan uchrashuv o‘tkazdi, deb xabar qiladi “Dunyo” AA muxbiri.

Suhbat chog‘ida tomonlar transport infratuzilmasini rivojlantirish, investitsiya loyihalarini amalga oshirish hamda yo‘l qurilishi sohasidagi hamkorlik imkoniyatlari yuzasidan fikr almashdilar.

Kompaniya vakillariga O‘zbekistonda amalga oshirilayotgan islohotlar, sarmoyaviy muhit va xorijiy kompaniyalarning infratuzilmaviy loyihalardagi ishtiroki istiqbollari to‘g‘risida ma’lumot taqdim etildi.

Uchrashuv yakunida ishchi aloqalarni davom ettirish va hamkorlikning ehtimoliy yo‘nalishlarini o‘rganishga kelishib olindi.