TOSHKENT, 25-may. /“Dunyo” AA/. Turizm sohasiga ixtisoslashgan xalqaro “Travel And Tour World” nashrida O‘zbekistonda sayyohlik sohasida amalga oshirilayotgan islohotlarga bag‘ishlangan tahliliy maqola eʼlon qilindi, deb xabar bermoqda “Dunyo” AA muxbiri.

Maqolada yozilishicha, O‘zbekistonda turizm sohasining rivojlanishi Markaziy Osiyodagi sayyohlik oqimlariga ham sezilarli taʼsir ko‘rsatmoqda.

2026-yilning dastlabki oylarida O‘zbekistonga kelayotgan xorijiy sayyohlar soni keskin oshgan. Bu esa mamlakatni nafaqat mintaqada, balki xalqaro miqyosda ham jozibador turistik yo‘nalishga aylantirmoqda.

Rasmiy maʼlumotlarga ko‘ra, 2026-yil yanvar–aprel oylarida O‘zbekistonga 4 million 48 mingdan ortiq xorijiy sayyoh tashrif buyurgan. Bu o‘tgan yilning shu davriga nisbatan qariyb 930 ming nafarga ko‘p bo‘lib, 29,9 foiz o‘sishni anglatadi. Ushbu ko‘rsatkichlar mamlakat turizm sohasi izchil rivojlanayotganini ko‘rsatmoqda.

Mutaxassislar bu o‘sishni bir nechta muhim omillar bilan izohlamoqda. Jumladan, viza tartiblarining soddalashtirilishi, transport infratuzilmasining yaxshilanishi va xalqaro aviaqatnovlar sonining ortishi sayyohlar uchun katta qulaylik yaratdi. Shu bilan birga, Markaziy Osiyo davlatlari o‘rtasidagi hamkorlikning kuchayishi ham turizm almashinuvini faollashtirmoqda.

Nashrda qayd etilishicha, O‘zbekistonning turistik jozibadorligi nafaqat qulay sayohat sharoitlari, balki boy tarixiy va madaniy merosi bilan ham bog‘liq. Samarqand, Buxoro, Xiva va Toshkent kabi shaharlarga qiziqish tobora oshib, mamlakat Buyuk Ipak yo‘lining zamonaviy turizm markazlaridan biri sifatida eʼtirof etilmoqda.

Tahlillarga ko‘ra, O‘zbekistonga kelayotgan sayyohlarning katta qismi Markaziy Osiyo davlatlari hissasiga to‘g‘ri keladi. Bu esa mintaqa davlatlari o‘rtasida iqtisodiy, madaniy va ijtimoiy aloqalar yana-da mustahkamlanayotganidan dalolat beradi.

Shuningdek, chegaralararo sayohatlarning faollashuvi diplomatik munosabatlar yaxshilanishi, savdo-iqtisodiy hamkorlik kengayishi va sayohat tartiblarining yengillashtirilishi bilan ham bog‘liq.

Transport tizimidagi yangilanishlar ham turizm rivojida muhim ahamiyat kasb etmoqda. Yangi temir yo‘llar, avtomobil magistrallari va aviaqatnovlar tarmog‘ining kengayishi O‘zbekistonni mintaqaning muhim tranzit va turistik markazlaridan biriga aylantirmoqda.

So‘nggi yillarda Xitoy, Hindiston va Janubiy Koreyadan kelayotgan sayyohlar soni ham sezilarli darajada ko‘paygan. Bu O‘zbekistonning jahon turizm bozoridagi o‘rni tobora mustahkamlanayotganini ko‘rsatadi.

Xalqaro aviaqatnovlar sonining ortishi ham muhim omillardan biri bo‘lmoqda. Yangi yo‘nalishlar O‘zbekistonni Osiyoning yirik shaharlari bilan bog‘lab, turistlar uchun yana-da qulay imkoniyatlar yaratmoqda.

Bundan tashqari, mamlakatda o‘tkazilayotgan madaniy tadbirlar va xalqaro festivallar ham O‘zbekistonning xalqaro imijini kuchaytirmoqda. Musiqa festivallari, gastronomik ko‘rgazmalar, xalqaro forumlar va madaniy tadbirlar sayyohlar qiziqishini yana-da oshirmoqda.