TOSHKENT, 2-mart. /“Dunyo” AA/. Poytaxtimizdagi Alisher Navoiy nomidagi O‘zbekiston davlat akademik katta teatrida Yaponiya anʼanaviy sanʼati – Kagura marosim konserti bo‘lib o‘tdi, deb xabar qilmoqda “Dunyo” AA muxbiri.

Tadbir O‘zbekiston Madaniyat vazirligi va Yaponiyaning Kitaxiroshima shahri hokimiyati hamkorligida tashkil etildi.

Kagura – yapon xalqining qadimiy, turli diniy marosimlarda o‘tkaziladigan sanʼat turi bo‘lib, u ramziy obrazlar, afsonaviy qahramonlar va milliy timsollarni raqs va musiqa orqali namoyish etadi.

Konsertda ishtirokchilar rang-barang niqoblar, urf-odatlarga xos liboslar va jonli musiqa ohanglaridan bahramand bo‘ldi. Spektaklda tarixiy va afsonaviy hikoyalar turli obraz va voqea-hodisalar orqali ochib berildi. Hikoyalar orqali yapon xalqining qadimiy urf-odatlar va tabiatga nisbatan munosabati namoyish qilindi.

Tadbirda Kitohiroshima shahar hokimi Xiroshi Mino fikr bildirib, ushbu konsertning Yaponiya va O‘zbekiston o‘rtasidagi madaniy va do‘stlik aloqalarini yana-da mustahkamlashdagi o‘rni xususida to‘xtalib o‘tdi.