ANQARA, 25-avgust. /“Dunyo” AA/. Taniqli turk diplomati va siyosatchisi, Turkiyaning Ozarbayjondagi sobiq elchisi Hulusi Qilich “Dunyo” AAga Ozarbayjon Prezidenti Ilhom Aliyevning 23–24-avgust kunlari O‘zbekistonga amalga oshirgan davlat tashrifi yakunlari haqida o‘z fikr-mulohazalarini bildirdi:

– Men Turkiyaning Ozarbayjondagi elchisi bo‘lib ishlagan davrimda ham O‘zbekiston Bokuda tarixiy, madaniy va insonlararo aloqalari mustahkam bo‘lgan qardosh mamlakat sifatida qadrlangan. Ammo o‘sha paytda ikki davlat o‘rtasidagi munosabatlarning bugungi darajaga chiqishi va mavjud imkoniyatlar haqidagi tasavvurlar ancha boshqacha edi.

So‘nggi o‘n yilda O‘zbekiston sezilarli darajada o‘zgardi. Ayniqsa, keyingi yillarda mamlakat tashqi dunyoga ochilib, qo‘shni davlatlar va turkiy mamlakatlar bilan aloqalarini yanada kuchaytirdi. O‘zbekiston mintaqaviy masalalarda ham faol ishtirok eta boshladi. Bugun Toshkent Bokuda nafaqat tarixiy va madaniy jihatdan yaqin poytaxt, balki muhim siyosiy va iqtisodiy hamkor sifatida ham qabul qilinmoqda. Bu o‘zgarishlar O‘zbekistonning mintaqadagi o‘rni va nufuzi tobora ortib borayotganini ko‘rsatadi. 

Bu so‘nggi yillardagi eng muhim natijalardan biridir. Bugun O‘zbekiston va Ozarbayjon o‘rtasida strategik sheriklik va ittifoqchilik munosabatlari mustahkamlandi. Bu yaqinlik faqat qardoshlik va do‘stlik haqidagi so‘zlarda emas, balki amaliy ishlar — savdo va investitsiyalarning o‘sishi, qo‘shma loyihalar, hududlar va biznes o‘rtasidagi aloqalar hamda yangi transport imkoniyatlarida ham o‘z ifodasini topmoqda. 

Shu bois Prezident Ilhom Aliyevning Toshkentga bu galgi tashrifi alohida ahamiyat kasb etadi. Bu tashrif shunchaki yaxshi munosabatlarni tasdiqlash emas, balki ikki davlat hamkorligining kelgusi yo‘nalishlarini belgilab beradigan muhim qadamdir.

Oliy davlatlararo kengashning uchinchi yig‘ilishi, ikki davlat rahbarlarining muzokaralari, yangi kelishuvlar va qo‘shma iqtisodiy-gumanitar loyihalar Boku va Toshkent o‘rtasidagi hamkorlik yangi bosqichga ko‘tarilayotganini ko‘rsatmoqda. 

Ayniqsa, transport-tranzit sohasidagi hamkorlikka katta ahamiyat berish lozim. Bugun geografik joylashuv mamlakatlar uchun yanada muhim strategik omilga aylanmoqda. Ozarbayjon Janubiy Kavkazda, O‘zbekiston esa Markaziy Osiyoning markazida joylashgan. Ikki davlatning transport va tranzit imkoniyatlarini birlashtirishi Sharq va G‘arbni bog‘laydigan yangi yo‘nalishlarni rivojlantirish uchun katta imkoniyatlar yaratadi. Bu istiqbollar bir necha yil avval ancha uzoqdek tuyulgan edi, bugun esa ular amaliy mazmun kasb etmoqda.