TOSHKENT, 28-iyul. /“Dunyo” AA/. 30-iyul kuni Toshkentda xalqaro vegan taomlari festivali bo‘lib o‘tadi, deb xabar bermoqda “Dunyo” AA muxbiri.

Festival O‘zbekiston Turizm qo‘mitasi va Hindiston elchixonasi hamkorligida o‘tkaziladi.

Tadbirda diplomatik korpus, sayyohlik kompaniyalari, restoran biznesi, sog‘lomlashtirish sanoati va ixtisoslashgan tashkilotlar vakillari ishtirok etadi.

Asosiy maʼruzachilardan biri “Lifestyle & Wellness" yo‘nalishi direktori, sog‘lom turmush tarzi va ovqatlanish bo‘yicha mutaxassis, Ayurveda sohasida PhD darajasiga ega doktor Nikxila bo‘ladi. Festival dasturidan ekspertlar muhokamasi, professional netvorking hamda hind va o‘zbek oshpazlari tomonidan tayyorlangan mualliflik vegan menyusi taqdimoti o‘rin olgan.

Eslatib o‘tamiz, veganchilik – bu go‘sht, baliq, tuxum, sut va asalni butunlay istisno qiluvchi qatʼiy o‘simlikka asoslangan parhezdir. Taomnoma faqat o‘simlik mahsulotlaridan tuziladi.

Mutaxassislarning fikricha, gastronomik va sog‘lomlashtirish turizmini rivojlantirish O‘zbekistonning sayyohlik taklifini diversifikatsiya qilishning istiqbolli yo‘nalishlaridan biridir.

Borgan sari ko‘proq sayohatchilar yo‘nalish tanlashda nafaqat madaniy merosga, balki gastronomiya sifatiga, sog‘lom turmush tarzi uchun mavjud imkoniyatlarga va dam olishning zamonaviy turlariga ham eʼtibor qaratmoqda.

Bunday sharoitda vegan va vegetarian taomlarining rivojlanishi yangi sayyohlik mahsulotlarini yaratishga hamda mamlakatning turli toifadagi sayyohlar uchun jozibadorligini oshirishga xizmat qiladi.