TOSHKENT, 5-yanvar. /“Dunyo” AA/. Yangi yil arafasida Surxondaryo viloyati Boysun tumanidagi ko‘p asrlik tarix va boy madaniy merosga ega Sayrob mahallasiga rasman “Turizm qishlog‘i” maqomini tasdiqlovchi sertifikat topshirildi, deb xabar qilmoqda “Dunyo” AA muxbiri.

“Uzbektourism.uz” portalining maʼlumotiga ko‘ra, ming yillik tarixga ega Sayrob mahallasi o‘zining betakror tabiati, milliy urf-odatlari, anʼanaviy meʼmorchiligi va boy madaniy merosi bilan mahalliy va xorijiy sayyohlar uchun jozibador hudud hisoblanadi. “Turizm qishlog‘i” maqomining berilishi hududda sayyohlik infratuzilmasini yana-da rivojlantirish, aholi bandligini taʼminlash, tadbirkorlikni qo‘llab-quvvatlash hamda milliy qadriyatlarni asrab-avaylashga ulkan hissa qo‘shadi.

Sertifikatni topshirish marosimida qayd etilganidek, mazkur tashabbus Sayrob mahallasining turizm salohiyatini to‘liq ro‘yobga chiqarish, hududni mamlakatimiz turizm xaritasida yana-da mashhur maskanga aylantirishga xizmat qiladi.