BRYUSSEL, 6-iyul. /“Dunyo” AA/. O‘zbekiston elchisi G‘ayrat Fozilov Belgiyaning “Daybreak Travel” kompaniyasi vakillari bilan uchrashuv o‘tkazdi, deb xabar bermoqda “Dunyo” AA muxbiri.

Uchrashuv davomida mamlakatimizning turizm salohiyatini Belgiya va Lyuksemburg bozorlarida targ‘ib etish, shuningdek, mahalliy turoperatorlar bilan hamkorlikni rivojlantirish istiqbollari ko‘rib chiqildi.

Belgiya tomoni sayyohlik yo‘nalishlarini kengaytirishdan manfaatdor ekanini bildirib, O‘zbekistonni Xitoy va tarixiy Buyuk ipak yo‘li bilan bog‘liq qo‘shma marshrutlarga kiritish istiqbolli ekanini qayd etdi. Shuningdek, O‘zbekistonning tarixiy shaharlari – Samarqand, Buxoro va Xivaga tashrifni o‘zida mujassam etgan qo‘shma turlarni ishlab chiqish imkoniyatiga alohida eʼtibor qaratildi.

Uchrashuv yakunida amaliy hamkorlikni davom ettirish, sayyohlik tadbirlari to‘g‘risida axborot almashish va turoperatorlar o‘rtasidagi aloqalarni rivojlantirish bo‘yicha kelishuvga erishildi.