ORXUS, 22-dekabr. /“Dunyo” AA/. O‘zbekiston elchixonasi vakillarining Daniyaning Orxus shahriga amaliy tashrifi tashkil etildi, deb xabar qilmoqda “Dunyo” AA muxbiri.

Unda diplomatlar ushbu shaharda vatandoshlarni birlashtirishga qaratilgan “O‘zbekiston tashabbuslari” uyushmasi faoliyati bilan tanishdi.

Mazkur diaspora tashkiloti vakillari bilan uning madaniy-maʼrifiy faoliyati, yoshlar tashabbuslari va tadbirkorligini qo‘llab-quvvatlash, madaniy-turistik tadbirlarni faollashtirish, vatandoshlarning intellektual salohiyatini O‘zbekiston taraqqiyotiga jalb qilish, shuningdek, ijtimoiy loyihalarni amalga oshirish masalalari muhokama qilindi.

Mazkur uyushma vakillari bilan hamkorlikda Orxus shahri va uning atrofida yashovchi hamyurtlarimiz ishtirokida davra suhbati tashkil etildi. Vatandoshlarga O‘zbekistonda turli sohalarda amalga oshirilayotgan islohotlar, xususan, xorijdagi vatandoshlarni birlashtirish, ularning muammolarini hal etish va har tomonlama qo‘llab-quvvatlashga qaratilgan davlat siyosatining ustuvor yo‘nalishlari haqida maʼlumot berildi.

Tashrif doirasida vatandoshlar uchun sayyor konsullik qabuli tashkil etilib, tegishli konsullik-huquqiy maslahat va xizmatlar ko‘rsatildi.

Uchrashuv yakunida 2026 yilda amalga oshirilishi rejalashtirilgan chora-tadbirlar bo‘yicha kelishib olindi.