DEHLI, 10-dekabr. /“Dunyo” AA/. O‘zbekistonning Hindistondagi elchixonasida muhim sana – mamlakatimiz Konstitutsiyasi qabul qilinganining 33 yilligiga bag‘ishlangan tadbir bo‘lib o‘tdi, deb xabar bermoqda “Dunyo” AA muxbiri.

Tadbir ishtirokchilari Asosiy qonunning mustaqil O‘zbekiston shakllanish jarayonida tutgan yuksak va tarixiy rolini taʼkidladi. Konstitutsiya jamiyatni har tomonlama demokratlashtirish va davlatning barqaror ijtimoiy-iqtisodiy rivojlanishini taʼminlash uchun mustahkam huquqiy asos ekani qayd etildi.

So‘nggi yillarda mamlakatimizda amalga oshirilayotgan jadal yangilanish jarayonlariga alohida eʼtibor qaratildi. Prezident Shavkat Mirziyoyev rahbarligida Yangi O‘zbekistonni barpo etishga qaratilgan keng ko‘lamli islohotlarga jahon hamjamiyati, jumladan, Hindiston ham katta qiziqish bildirayotgani urg‘ulandi.

Tadbirda inson shaʼni va qadr-qimmatini himoya qilish O‘zbekistonda davlat siyosatining eng ustuvor yo‘nalishi bo‘lib qolayotganiga alohida eʼtibor qaratildi.

Shu kunlarda YUNESKO Nomoddiy madaniy merosni muhofaza qilish hukumatlararo qo‘mitasining Dehlida bo‘lib o‘tayotgan yigirmanchi sessiyasida qatnashayotgan mamlakatimiz delegatsiyasi tadbirga o‘ziga xos fayz bag‘ishladi.

Delegatsiyaning tadbirdagi ishtiroki mamlakatimiz siyosiy-huquqiy taraqqiyoti va uning madaniy anʼanalari o‘rtasidagi uzviy bog‘liqlikni yaqqol namoyish etdi. Ishtirokchilar O‘zbekistonning boy madaniy-gumanitar merosini saqlash muhimligi yuzasidan fikr almashdi, uning ko‘plab elementlari YUNESKOning turli ro‘yxatlariga kiritilganini qayd etdi.