FRANKFURT-MAYN, 13-oktyabr. /"Dunyo" AA/. Frankfurt-Mayn shahrida Germaniya va Chexiyada tahsil olayotgan va ishlayotgan vatandoshlar o'rtasida futbol musobaqasi o'tkazildi, deb xabar qilmoqda "Dunyo" AA muxbiri.

 O'zbekistonning Frankfurt-Mayn shahridagi Bosh konsulxonasi va "Humo" nemis-o'zbek madaniy jamiyati ko'magida tashkil etilgan sport musobaqasi turli yoshdagi va turli millat vakillaridan iborat yurtdoshlarimizni birlashtirdi.

 Turni o'zbek yoshlarini sportga keng jalb etish orqali sog'lom turmush tarzini targ'ib qilish, Germaniyadagi o'zbek yoshlar hamjamiyatini mustahkamlash, O'zbekistonda amalga oshirilayotgan islohotlar haqida ishtirokchilarni xabardor qilish maqsadida tashkil etildi.

Musobaqada Germaniyaning turli federal shtatlaridan, shuningdek, Chexiyadagi hamyurtlarimizdan iborat o'n oltita jamoa ishtirok etdi. Musobaqaning hal qiluvchi final o'yinida "Halle" va "Nihol" jamoalari o'zaro bellashdi.

 Yakunda "Halle" jamoasi g'alaba qozonib, turnir kubogini qo'lga kiritdi.