TURIN, 1-dekabr. /“Dunyo” AA/. Turin politexnika universitetida ilk bor Italiyada tahsil olayotgan talabalar va shu yerda yashayotgan vatandoshlar o‘rtasida “Zakovat” intellektual musobaqa o‘tkazildi, deb xabar qilmoqda “Dunyo” AA muxbiri.

Tadbir “Turin O‘zbek talabalari assotsiatsiyasi” faollari tomonidan Turin politexnika universiteti va O‘zbekistonning Rimdagi elchixonasi ko‘magida tashkil etildi.

Intellektual o‘yin uch bosqichda – “Zakovat QUIZ”, “Zakovat savollari” va “Sardorlar bellashuvi” bo‘yicha o‘tkazildi.

Bellashuvda 48 nafar ishtirokchi 8 ta jamoaga bo‘lingan holda qatnashdi. Jamoalar Italiyaning turli shaharlaridagi oliy taʼlim muassasalarida tahsil olayotgan talabalar orasidan shakllantirildi. Jumladan, “Katenachchio” Milandan, “Sugsvang” Bolonya va Florensiyadan, “Stella” Rimdan, “Patriot”, “Turon” “Matonat”, “Sirius” va “Paradoks” jamoalari Turin shahridan saralandi.

Bellashuvlar yakunida 1-o‘rin “Sirius”, 2-o‘rin “Sugsvang” va 3-o‘rinni egallagan “Matonat” jamoalari elchixona va homiylar tomonidan pul va esdalik sovg‘alari bilan taqdirlandi.

Ishtirokchilar ushbu intellektual musobaqa Italiyada ilk bor tashkil etilgani va bunday tadbirlar o‘zbek talabalari o‘rtasida do‘stlik va o‘zaro hurmat aloqalarning mustahkamlanishiga xizmat qilishini taʼkidladi.