KOPENGAGEN, 4-dekabr. /“Dunyo” AA/. “Uzasiaexport” savdo platformasi orqali O‘zbekiston tarixida ilk bor Daniyaga oziq-ovqat va quruq meva mahsulotlari eksporti amalga oshirildi, deb xabar qilmoqda “Dunyo” AA muxbiri.

Mazkur shartnoma Daniyaning oziq-ovqat importi bilan shug‘ullanuvchi yirik “Eurofoods Aps” kompaniyasi bilan tuzildi va mahsulotlar sifat, ekologik tozalik hamda xalqaro standartlarga muvofiqligi asosida tanlab olindi.

Samarqand viloyati Urgut tumani korxonasi tomonidan umumiy qiymati 19 tonna bo‘lgan mag‘iz va turshak buyurtmaga asosan yetkazib berildi.

O‘zaro muzokaralar, tahlillar va logistika jarayonlari natijasida ushbu eksport bitimi muvaffaqiyatli amalga oshirildi.

Bu O‘zbekiston uchun nafaqat yangi savdo imkoniyatlarini ochdi, balki mamlakatimiz eksport geografiyasini yana bir davlatga kengaytirdi.