PLONSK, 3-oktyabr. "Dunyo" AA/. Polshaning Plonsk shahrida O'zbekiston davlat mustaqilligining 34 yilligi hamda O'qituvchi va murabbiylar kuni munosabati bayram tadbirlari o'tkazildi, deb xabar qilmoqda "Dunyo" AA muxbiri.

Bayram tadbirlari O'zbekiston elchixonasi tomonidan "Vatandoshlar" jamoat fondi va "Green Crops" kompaniyasi bilan hamkorlikda tashkil etildi.

Tadbir avvalida Prezident Shavkat Mirziyoyevning O'zbekiston davlat mustaqilligining o'ttiz to'rt yilligiga bag'ishlangan tantanali marosimdagi nutqi hamda O'qituvchi va murabbiylar kuni munosabati bilan yo'llagan tabrigi o'qib eshittirildi.

Ishtirokchilarga davlatimiz rahbari boshchiligida O'zbekistonda amalga oshirilayotgan yangilanishlar, xususan yoshlarni qo'llab-quvvatlash, ularning ta'lim olishi va o'z salohiyatlarini to'laqonli namoyon etishi uchun yaratilgan shart-sharoitlar hamda xorijda bilim va tajriba orttirish imkoniyatlarini yana-da kengaytirishga qaratilgan islohotlar haqida so'zlab berildi.

 Tantanalarning madaniy qismida Kamron Erkinov va Nodira Seydjanova ishtirokida taqdim etilgan konsert dasturi barchaga xushkayfiyat ulashdi.

Tadbir doirasida vatandoshlar o'rtasida futbol va voleybol bo'yicha turnir tashkil etildi.