AL-KUVAYT, 9-aprel. /“Dunyo” AA/. Kuvaytning “Q8 Press” nashrida shu yil iyun oyida Toshkent shahrida bo‘lib o‘tadigan muhim investitsiya tadbir – V Xalqaro investitsiya forumi (TIIF-2026)ni o‘tkazishga puxta tayyorgarlik ko‘rilayotgani bo‘yicha maqola eʼlon qilindi, deb xabar bermoqda “Dunyo” AA muxbiri.

Maqolada taʼkidlanishicha, ushbu forum 16–19-iyun kunlari Prezident Shavkat Mirziyoyev raisligida Xorijiy investorlar kengashining 4-yig‘ilishi va Eksport salohiyati ko‘rgazmasi bilan birga bo‘lib o‘tadi.

TIIF endilikda yillik yig‘ilishdan ko‘ra kengroq imkoniyatlarga ega strategik platformaga aylandi. Forum yetakchi investorlar va iqtisodiy arboblarni haqiqiy hamkorlik va aniq shartnomalar imzolash uchun birlashtiradi.

“Ilk forumda (TIIF-2022) 56 mamlakatdan 2000 nafardan ortiq ishtirokchini jalb qilgan va 7,8 milliard dollarlik investitsiya shartnomalarini imzolashga sabab bo‘lgan. 2023-yili bu ko‘rsatkich 11 milliard dollarga yetdi, TIIF-2024 esa 26,6 milliard dollarlik kelishuvlarni qayd etib, O‘zbekistonning Markaziy Osiyodagi mintaqaviy markaz sifatidagi mavqeini mustahkamladi. 2025-yilgi TIIF-2025 esa rekord darajada 8000 dan ortiq ishtirokchi, jumladan 97 mamlakatdan qariyb 3000 xorijiy mehmon va 450 yuqori martabali mehmonni birlashtirdi”, deya maʼlumot keltirilgan nashrda.

TIIF va iqtisodiy tashabbuslar O‘zbekistonning 2017-yildan boshlangan tub islohotlari samarasini aks ettiradi. Valyuta bozorining liberallashtirilishi, investorlar kafolatlarining kuchaytirilishi va mingdan ortiq qo‘shma korxonalar ishga tushirilishi 90 milliard dollardan ortiq xorijiy investitsiyalarni jalb qilgan va 2024-yilda YIM o‘sishini 6,5% ga yetkazgan. Maqsad – 2030 yilga kelib 200 milliard dollar investitsiyani jalb qilish.

“Montfort Eurasia” hisobotiga ko‘ra, Amerika va Britaniya investorlarining Markaziy Osiyoga qiziqishi uch baravar oshgan, mintaqaviy tushunish reytingi 4,92 dan 7,36 gacha yaxshilandi. Investorlarning 47 foizi mintaqaga, xususan sanoat, neft-gaz va konchilik sohalariga qiziqish bildirgan.

“Q8 Press”da qayd etilishicha, TIIF mintaqaviy integratsiyani ham kuchaytiradi. Prezident Mirziyoyev Markaziy Osiyoda “Integratsiyalashgan investitsiya va savdo zonasi”ni taklif qilib, savdoning 3,5 baravar oshib, 13 milliard dollarga yetishiga hissa qo‘shdi.

2026 yilgi forumda ijodiy va ko‘ngilochar tadbirlar ham bo‘ladi: Olimpiya qishlog‘ida tennis turniri, 1000 ishtirokchi bilan marafon va “Stikhiya” xalqaro elektron musiqa va sanʼat festivali. Yuqori darajadagi xalqaro maʼruzachilar ro‘yxati yakunlanmoqda va investitsiya shartnomalari tayyorlanmoqda.

Xorijiy investorlar kengashining 4-yig‘ilishi forumning asosiy tarkibiy qismi hisoblanadi. TIIF-2026 O‘zbekistonning ochiq va jozibador iqtisodiy muhitini namoyon etadi va Toshkentni Markaziy Osiyo va undan tashqarida yetakchi investitsiya yo‘nalishiga aylantiradi.