SAMARQAND, 13-aprel. /“Dunyo” AA/. Bavariyaning Yevropa va xalqaro ishlar bo‘yicha davlat vaziri Erik Baysvenger boshchiligidagi Germaniya delegatsiyasi Samarqandga tashrif buyurdi, deb xabar bermoqda “Dunyo” AA muxbiri.

Uchrashuvda Samarqand viloyati hokimi Adiz Boboyev va Germaniya vaziri o‘rtasida ikki tomonlama aloqalarni kengaytirish bo‘yicha muloqot bo‘lib o‘tdi. Erik Baysvenger Bavariyada malakali mutaxassislarga ehtiyoj yuqori ekaniga eʼtibor qaratdi. Shu munosabat bilan, muzokaralarning asosiy mavzusi nemis standartlari asosida kadrlar tayyorlaydigan qo‘shma markazlarni tashkil etish bo‘ldi.

Adiz Boboyev bavariyalik investorlarga biznes tashabbuslarini amalga oshirish uchun barcha zarur infratuzilma va imtiyozlarni taqdim etishga tayyor ekaniga ishontirdi. Shuningdek, hududlar o‘rtasida sayyohlar oqimini ko‘paytirishga qaratilgan turizm sohasidagi loyihalar muhokama qilindi.

Dasturning muhim qismi “Profi Deutsch” markaziga tashrif bo‘ldi. U yerda davlat vaziri nemis tilini o‘qitish jarayoni va TELC xalqaro imtihonlarining o‘tkazilishi bilan tanishdi. Yoshlarni tayyorlash sifatiga berilgan yuqori baho yangi kelishuvlarga asos bo‘ldi.

Tashrif yakunida besh yillik hamkorlik memorandumi imzolandi. Hujjatni Germaniyaning “BBW International” tashkiloti, viloyat kasbiy taʼlim boshqarmasi, “Profi Deutsch” markazi hamda Germaniya–O‘zbekiston iqtisodiy hamkorlik byurosi “DUWK Büro” rahbarlari imzoladi.

Memorandumga ko‘ra, hamkorlik mehmonxona ishi, turizm va gastronomiya sohalarida jahon darajasidagi mutaxassislarni tayyorlashga qaratiladi. Imzolangan hujjat nafaqat iqtisodiy kooperatsiyani mustahkamlashga, balki o‘zbekistonlik yoshlar uchun xalqaro miqyosda kasbiy o‘sishning yangi imkoniyatlarini ochishga xizmat qiladi.