O‘SH, 3-aprel. /“Dunyo” AA/. Farg‘ona viloyatida Markaziy Osiyo davlatlari hamda Ozarbayjon ishtirokida do‘stlik forumi bo‘lib o‘tdi, deb xabar bermoqda “Dunyo” AA muxbiri.

Mazkur forumda yurtimizdan tashqari Qozog‘iston, Qirg‘iziston, Tojikiston va Ozarbayjondan kelgan mehmonlar ishtirok etdi.

Uchrashuvlar “Do‘stlik stellasi” poyiga gul qo‘yish marosimi bilan boshlandi. Farg‘ona shahridagi “Do‘stlik uyi”da sakkizta milliy madaniy markaz o‘z anʼanalari va mahorat darslarini namoyish qildi.

Forum doirasida Farg‘ona davlat universitetida ilmiy-amaliy konferensiya o‘tkazilib, mintaqaviy barqarorlik, o‘zaro ishonch va strategik sheriklik masalalari muhokama qilindi. Ishtirokchilar Prezident Shavkat Mirziyoyevning ochiq siyosati tufayli qo‘shni davlatlar bilan munosabatlar yangi bosqichga chiqqanini taʼkidladi.

Tadbir davomida qator faol ishtirokchilar “Xalqlar do‘stligi” ko‘krak nishoni bilan taqdirlandi. Ular orasida Qirg‘iziston Ijtimoiy taʼminot va migratsiya vazirining birinchi o‘rinbosari Kamchibek Dosmatov va O‘sh Davlat o‘zbek akademik musiqali drama teatri direktori Aʼzamjon Abdurazzakov ham bor.

Mehmonlar ushbu tadbirni do‘stlik va yaqin qo‘shnichilik ramzi sifatida baholadi. Ular xalqlar o‘rtasidagi azaliy aloqalar va birlik yanada mustahkamlanayotganini qayd etdi.

Forum yakunida amaliy kelishuvlar ham imzolandi. Jumladan, Qirg‘izistonning Botken viloyati hamda Farg‘ona viloyatining So‘g‘ va Farg‘ona tumanlari o‘rtasida hamkorlik memorandumlari tuzildi.