TOSHKENT, 15-avgust. /"Dunyo" AA/. 2025-yil 1-iyul holatiga ko'ra, O'zbekistonning doimiy aholisi 37,9 million kishini tashkil etmoqda, deb xabar qilyapti "Dunyo" AA muxbiri.

Milliy statistika qo'mitasi ma'lumotlariga ko'ra, ulardan 12,2 million kishi (32,2 foiz) mehnatga layoqatli yoshdan kichik, 21,2 million kishi (56 foiz) mehnatga layoqatli yoshda va 4,5 million kishi (11,8 foiz) mehnatga layoqatli yoshdan kattadir.

Ekspertlarning ta'kidlashicha, mehnatga layoqatli aholining yuqori ulushi mamlakat uchun "demografik bonus" bo'lib, iqtisodiyotni yanada rivojlantirish va O'zbekistonda keng ko'lamli islohotlarni amalga oshirish uchun muhim manba hisoblanadi.