SEUL, 28-iyul. /"Dunyo" AA/. Janubiy Koreyada istiqomat qilayotgan xorijliklar va chet el fuqaroligiga ega etnik koreyslar soni rekord darajaga yetdi, deb xabar bermoqda "Dunyo" AA muxbiri.

"The Korea Times" nashri ma'lumotiga ko'ra, 2025-yil iyul oyi oxiriga kelib xorijiy mamlakatlar fuqarolarining umumiy soni 2,73 million kishiga yetgan, ularning har uchinchisi xitoylikdir.

Taqqoslash uchun "COVID‑19" pandemiyasigacha bo'lgan davrda xorijlik rezidentlar soni 2,52 million kishini tashkil qilgan bo'lsa, 2021-yilda ularning soni 1,96 millionga kamaygan. 2024-yil oxiriga kelib bu ko'rsatkich 2,65 millionga ko'tarilib, o'sha paytda yangi rekordni qayd etdi.

Xususan, Janubiy Koreyada yashash bo'yicha Xitoy fuqarolari yetakchilik qilmoqda (972176 kishi). Ulardan keyingi o'rinlarda vyetnamliklar (341125 kishi), amerikaliklar (196664 kishi) va taylar (173710 kishi) joylashgan. O'zbek diasporasi esa 98458 kishini tashkil qiladi.