TOSHKENT, 5-sentabr. /"Dunyo" AA/. Afg'onistonda sodir bo'lgan so'nggi yillardagi eng kuchli zilzila oqibatida halok bo'lganlar soni 2205 kishiga yetdi, deya xabar bermoqda "Dunyo" AA muxbiri.

"Baxtar" axborot agentligi ma'lumotiga ko'ra, vafot etganlarning asosiy qismi tog'li Kunar viloyati aholisi hisoblanadi. Ushbu hududda, shuningdek, 3640 kishi jarohat olgan.

Afg'oniston rasmiy vakilining o'rinbosari mulla Hamdulla Fitratning aytishicha, qutqaruv ishlari davom etmoqda, turli hududlarda odamlar uchun chodirlar o'rnatilgan va birinchi shoshilinch yordamni yetkazib berish uyushqoqlik bilan amalga oshirilmoqda.  U, shuningdek, ba'zi davlatlar gumanitar yordam va professional qutqaruv brigadalarini operatsiyalarda ishtirok etish uchun yuborgan. Zilziladan katta talafot ko'rgan hududlarga olib boruvchi yo'llar harakatlanish uchun qayta ochilgan.

Eslatib o'tamiz, O'zbekiston Afg'oniston rahbariyatiga hamdardlik bildirib, ushbu fojia oqibatlarini bartaraf etishda mumkin bo'lgan yordamni ko'rsatishga tayyorligini ma'lum qilgan edi.