TOSHKENT, 21-oktyabr. /"Dunyo" AA/. Yaponiya parlamenti yaqinda hukmron Liberal-demokratik partiya rahbari sifatida saylangan Sanae Takaitini mamlakatning yangi Bosh vaziri etib tasdiqladi, deb xabar qilmoqda "Dunyo" AA muxbiri.

 "RIA Novosti" ma'lumotiga ko'ra, uning nomzodini deputatlarning aksariyati qo'llab-quvvatladi. Shu tariqa, Sanae Takaiti Yaponiya tarixida bu lavozimni egallagan birinchi ayol bo'ldi.

 Uning eng muhim vazifalaridan biri yangi vazirlar mahkamasini shakllantirishdir. Sanae Takaitining ta'kidlashicha, u mamlakat oldida turgan iqtisodiy inqiroz, kadrlar yetishmovchiligi, siyosiy ishonchni tiklash kabi ustuvor masalalarni hal qilishga e'tibor qaratadi.

Sanae Takaichi 1961-yilda Nara shahrida tug'ilgan. Siyosatchi Kobe universiteti hamda Matsushita davlat boshqaruvi va menejment institutini tamomlagan. 1993-yilda u mustaqil nomzod sifatida vakillar palatasiga saylangan. 1996-yilda Liberal-demokratik partiyaga qo'shildi. 2025-yilning 4-oktyabr kuni esa ushbu partiya raisligiga saylandi.