QOHIRA, 26 oktabr. /"Dunyo" AA/. Misrning yetakchi ommaviy axborot vositalarida Oʻzbekiston va Finlyandiya oʻrtasidagi ekologiya va barqaror rivojlanish sohasidagi hamkorlik istiqbollariga bagʻishlangan turkum maqolalar e'lon qilindi, deb xabar bermoqda "Dunyo" AA muxbiri.

Xususan, "Al-Diplomasi" axborot agentligi oʻz oʻquvchilariga Oʻzbekiston va Finlyandiya oʻrtasidagi iqtisodiy, texnologik, ta'lim va atrof-muhit sohalaridagi munosabatlarni rivojlantirish istiqbollarini har tomonlama tahlil qilish va ularga bagʻishlangan maqolani taqdim etdi.

Unda Finlyandiya texnologik yetakchilik, samarali boshqaruv va ilgʻor ijtimoiy siyosatni birlashtirgani ta'kidlangan. Shu bilan birga, Oʻzbekiston soʻnggi sakkiz yil ichida Markaziy Osiyoda islohotlarning tezlashtiruvchisi sifatida faoliyat yuritdi. Normativ oʻzgarishlar xususiy kapital uchun maydonni kengaytirdi, transport va energetika loyihalari esa sanoatlashtirish va eksport uchun yangi poydevor yaratdi.

"Oʻzbekiston va Finlyandiya oʻrtasidagi hamkorlik yaqin kelajakda barqaror yoʻnalishga oʻtishi mumkin. Finlyandiya uchun Oʻzbekiston mahsulotlar va butlovchi qismlarning ishonchli yetkazib beruvchisi va texnologiyalar va uskunalar uchun yangi bozor hisoblanadi. Oʻzbekiston uchun esa hamkorlikni chuqurlashtirish Shimoliy Yevropada zamonaviy yechimlar va tarqatish kanallariga kirishni anglatadi", – deyilgan nashrda

Misrning "Sada al-Balad" axborot agentligi "Oʻzbekiston va Finlyandiya oʻrtasida ekologiya hamda barqaror rivojlanish sohasidagi hamkorlik istiqbollari" sarlavhali maqolani e'lon qildi.

Unda Oʻzbekiston va Finlyandiya ekologiya, barqaror atrof-muhitni boshqarish va iqlim oʻzgarishini yumshatish sohalarida hamkorlikni chuqurlashtirish uchun katta salohiyatga ega ekanligi ta'kidlangan. Ikki mamlakatning atrof-muhitni muhofaza qilish agentliklari vakillari xalqaro tashkilotlar va rivojlanish banklari koʻmagida tashkil etilgan xalqaro konferensiyalar, forumlar va loyihalar orqali faol hamkorlik qilmoqda.

"Amaliy hamkorlikning yorqin namunasi Oʻzbekiston Gidrometeorologiya xizmati agentligi, Finlyandiya Tashqi ishlar vazirligi va Finlyandiya Meteorologiya institutining qoʻshma loyihasidir. 2 million dollarlik loyiha Oʻzbekiston gidrometeorologiya xizmatining salohiyatini oshirish, mutaxassislarni ob-havo sharoitlari va tabiiy ofatlarni bashorat qilishning zamonaviy usullari boʻyicha oʻqitish hamda iqlim xizmatlari tizimini va iqlim oʻzgarishiga moslashish choralarini ishlab chiqishga qaratilgan", – deb yozilgan maqolada.