DOHA, 5-iyul. /"Dunyo" AA/. Qatar universitetining Tadbirkorlik va tashkiliy mahorat markazi direktori Said Elbanna "Dunyo" AA uchun intervyusida O'zbekiston Prezidenti Shavkat Mirziyoyevning 2-4-iyul kunlari Ozarbayjonga buyurgan davlat tashrifi haqidagi fikrlarini bildirdi:

– O'zbekiston Prezidentining davlat tashrifi ikki qardosh davlat o'rtasidagi munosabatlarni rivojlantirishda muhim bosqich bo'ldi.

Birinchi navbatda, tashrif O'zbekiston va Ozarbayjon o'rtasidagi strategik sheriklikni chuqurlashtirish yo'lidagi barqaror tendensiyani tasdiqlaganini qayd etishni istardim. Strategik sheriklikni yanada chuqurlashtirish to'g'risidagi qo'shma deklaratsiya imzolanishi katta ahamiyatga ega bo'lib, unda tomonlarning mintaqaviy va xalqaro siyosat doirasida sa'y-harakatlarini muvofiqlashtirishga tayyorligi yana bir bor ta'kidlanadi.

Mamlakatlar o'rtasidagi savdo-iqtisodiy yo'nalishda ijobiy o'sish tendensiyasi kuzatilmoqda. Tashrif chog'ida energetika, qishloq xo'jaligi, transport, ko'chmas mulk va logistika sohalarini qamrab olgan qo'shma investitsiya loyihalarini amalga oshirish bo'yicha kelishuvlar imzolandi. O'zbekistonda Ozarbayjon kapitali ishtirokida qo'shma ishlab chiqarishni yo'lga qo'yish, shuningdek, Kaspiy dengizi orqali logistika koridorini kengaytirish bo'yicha kelishuvlar mavjud.

Markaziy Osiyoni Yevropa bilan bog'lovchi Transkaspiy transport yo'lini (O'rta yo'lak) rivojlantirish savdo yo'llarining global transformatsiyasi sharoitida muhim ahamiyatga ega.

Prezident Shavkat Mirziyoyevning Ozarbayjonga tashrifi nafaqat yuksak davlatlararo munosabatlarning namoyishi bo'ldi, balki amaliy hamkorlikka ham yangi sur'at bag'ishladi, deb hisoblayman. Imzolangan hujjatlar va erishilgan kelishuvlar ikki davlatning mintaqa hamda xalqaro maydondagi mavqeini mustahkamlaydigan uzoq muddatli loyihalarga asos soldi.