SHANXAY, 31-may. /"Dunyo" AA/. Shanxay global boshqaruv va mintaqaviy tadqiqotlar akademiyasi direktori Yan Chen (Xitoy) "Dunyo" AA uchun intervyusida Italiya Bosh vaziri Jorja Melonining 28-29-may kunlari O'zbekistonga buyurgan tashrifi haqidagi fikrlarini bildirdi.

– Italiya Bosh vazirining O'zbekistonga tashrif Yevropa Ittifoqining Markaziy Osiyodagi siyosiy va iqtisodiy ishtirokini kuchaytirish yo'lidagi muhim qadam sifatida baholanmoqda. Yevropa Ittifoqining yetakchi davlatlaridan biri rahbarining Samarqandga tashrifi O'zbekistonga mintaqadagi asosiy hamkor sifatida xalqaro qiziqish ortib borayotganini ta'kidlab, uning ishonchli va mustaqil ishtirokchi sifatidagi maqomini tasdiqlaydi.

Tashrif mazmuni, jumladan, investitsiya, "yashil" energetika, sanoat kooperatsiyasi, madaniyat va ta'lim sohalaridagi kelishuvlarning imzolanishi islohotchi O'zbekistonning barqarorligi va ochiqligini aks ettiruvchi ijobiy signaldir. Rasmiy Toshkentning Yevropa yo'nalishi Xitoy bilan strategik sheriklikni to'ldiradigan, uning o'rnini bosmaydigan ko'p vektorli siyosatga sodiqligini alohida ta'kidlash lozim.

Shuningdek, Italiya tomonining iqtisodiy pragmatizmi ham alohida e'tiborga loyiq bo'lib, Italiyaning O'zbekistonga qiziqishi strategik sheriklik xarakteriga ega ekanligini ta'kidlaydi. Ushbu tashrif YIning mintaqa bilan hamkorlikni an'anaviy Yevroatlantika ta'siridan tashqarida, ayniqsa, Yevroosiyo infratuzilmasi, energetika va logistika resurslari uchun o'sib borayotgan global raqobat sharoitida chuqurlashtirishga qaratilgan kengroq siyosatining bir qismidir.

O'zbekistonning YEI, jumladan, Italiya bilan kengaygan hamkorligi yirik Yevroosiyo loyihalari doirasida Xitoy va Yevropa manfaatlari mutanosib bo'lishi mumkin bo'lgan uch tomonlama hamkorlik imkoniyatlarini ochib beradi.

Umuman olganda, Italiya Bosh vazirining tashrifi O'zbekistonning mintaqaviy siyosat va jahon iqtisodiyotidagi roli ortib borayotganining tabiiy natijasi sifatida baholanmoqda. Bu ko'p tomonlama munosabatlarni mustahkamlashga hissa qo'shadi. Rasmiy Toshkentning geosiyosiy salmog'ini oshiradi hamda Xitoy, Yevropa Ittifoqi va Markaziy Osiyo mamlakatlari o'rtasida, ayniqsa, barqaror rivojlanish, texnologiya va logistika sohalarida qo'shma tashabbuslar uchun qo'shimcha o'sish nuqtalarini yaratishi mumkin.