AMSTERDAM, 23-may. /"Dunyo" AA/. Niderlandiyalik tashqi siyosat bo'yicha ekspert Filipp Vijers "Dunyo AA uchun intervyusida O'zbekiston Prezidenti Shavkat Mirziyoyevning 21-22-may kunlari Sloveniyaga buyurgan rasmiy tashrifi haqidagi fikrlarini bildirdi:

– Tashrif O'zbekiston va Sloveniya o'rtasidagi ikki tomonlama munosabatlar rivojida muhim bosqich bo'ldi. U ikki davlatning iqtisodiy hamkorlikni kengaytirish, yangi ishbilarmonlik sheriklikni rivojlantirish, shuningdek, O'zbekistonning Yevropa Ittifoqi bozori bilan o'zaro hamkorligini yanada chuqurlashtirish istagini alohida ta'kidladi.

Prezident Shavkat Mirziyoyevning tashrifidan ko'zlangan asosiy maqsad sanoat, farmatsevtika, elektrotexnika, "yashil" energetika, qishloq xo'jaligi kabi muhim tarmoqlarda qo'shma loyihalarni amalga oshirishga alohida e'tibor qaratgan holda o'zaro manfaatli savdo-iqtisodiy aloqalarni faollashtirishdan iborat.

Sloveniya Yevropa Ittifoqiga a'zo davlat sifatida O'zbekiston uchun kengroq Yevropa bozoriga chiqish uchun strategik tramplin sifatida ko'riladi. Tashrif O'zbekiston va Yevropa Ittifoqi o'rtasidagi tovar ayirboshlash barqaror o'sib borayotgan bir sharoitda amalga oshirilmoqda. 2024-yilda O'zbekistonning Yevropa Ittifoqi mamlakatlariga eksporti 1,7 milliard dollarga yetdi.

O'zbekiston va Sloveniya o'z oldiga to'qimachilik, qishloq xo'jaligi mahsulotlari, farmatsevtika, sanoat uskunalari va yuqori qo'shilgan qiymatga ega mahsulotlar kabi sohalardagi savdoni diversifikatsiya qilish orqali o'zaro tovar ayirboshlash hajmini 500 million AQSh dollariga yetkazish bo'yicha ulkan maqsadni qo'ygan.

O'zbekiston Prezidentining Sloveniyaga tashrifi nafaqat O'zbekiston-Sloveniya munosabatlarini mustahkamlash, balki O'zbekistonning butun Yevropa Ittifoqi bilan hamkorligini kengaytirishga qaratilgan sheriklikning yangi davrining katalizatori sifatida ko'rilmoqda.

Ishonchim komilki, tashrif natijalari yangi sarmoyalarni jalb qilish, eksport imkoniyatlarini yaratish, shuningdek, innovatsiyalar va bilim almashishni rag'batlantirishga xizmat qiladi. Bularning barchasi har ikki davlatga ham manfaat keltiradi hamda O'zbekiston iqtisodiyotining yanada yuksalishi va diversifikatsiya qilinishiga xizmat qiladi.