DUSHANBE, 6-fevral. /"Dunyo" AA/. Tojikiston Milliy fanlar akademiyasi Falsafa, siyosatshunoslik va huquq instituti ilmiy xodimi Viktor Kim "Dunyo" AA uchun intervyusida O'zbekiston Prezidenti Shavkat Mirziyoyevning 4-5-fevral kunlari Malayziyaga buyurgan rasmiy tashrifi yakunlari haqidagi fikrlarini bildirdi:

– O'zbekiston va Malayziya o'rtasidagi ikki tomonlama aloqalar xalqaro munosabatlar amaliyotida davlatlarning strategik maqsadlari tarixiy meros va ma'naviy qadriyatlarni asrab-avaylash, shuningdek, ikki xalq va kelajak avlod farovonligi yo'lida iqtisodiy rivojlanish masalalarida bir-biriga to'g'ri keladigan muvaffaqiyatli misoldir. O'zgarib borayotgan dunyoning bugungi murakkab sharoitlarida O'zbekiston va Malayziya yetakchilari o'z davlatlarining rivojlanish istiqbollari haqida aniq tasavvurga ega. Shuningdek, O'zbekiston va Malayziya rahbarlari tomonidan amalga oshirilayotgan "O'zbekiston – 2030" va "Malayziya Madani" strategik dasturlarining maqsad va vazifalari o'xshashdir. Ikki davlat manfaatlarining o'xshashligi o'zaro hamkorlikni kengaytirish va chuqurlashtirish istiqbollari uchun ishonchli zamin yaratmoqda.

O'zbekiston Prezidenti Shavkat Mirziyoyevning Malayziyaga rasmiy tashrifi va Malayziya Bosh vaziri Anvar Ibrohim bilan o'tkazilgan samarali muzokaralar ikki tomonlama munosabatlar rivojiga qo'shimcha sur'at bag'ishlaydi hamda mintaqalararo hamkorlikka yo'l ochadi. Ikki davlat yetakchilari o'zaro munosabatlarning rivojlanishi Markaziy Osiyo va ASEAN mintaqalari o'rtasidagi hamkorlikni kengaytirish uchun ham yangi imkoniyat va istiqbollarni ochib berishini yaxshi tushunadi. "Markaziy Osiyo – ASEAN" formatida tashqi ishlar vazirlari darajasidagi muloqot platformasini yaratish kabi istiqbolli rejalar Malayziya Bosh vaziri Anvar Ibrohimning 2024-yilda O'zbekistonga tashrifi chog'ida ham muhokama qilingan edi.

Yanvar oyida o'tkazilgan "Muloqotdan – harakat sari: O'zbekiston va Malayziya strategik hamkorlik yo'lida" mavzusidagi yetakchi tahlil markazlari va tadqiqot tuzilmalari vakillari ishtirokidagi davra suhbati, O'zbekistonning sayyohlik salohiyati va madaniy merosi taqdimoti, ikki mamlakat yetakchi universitetlari rektorlari forumi va boshqa tadbirlar ikki tomonlama munosabatlar yaqin kelajakda strategik darajasiga chiqishidan guvohlik bermoqda.