O'Sh, 10-fevral. /"Dunyo" AA/. O'zbekiston bosh konsuli Zafarbek Ahmedov O'sh shahrining yangi tayinlangan meri Jenishbek Toqtorbayev bilan uchrashdi, deb xabar qilmoqda "Dunyo" AA muxbiri 

Muloqot avvalida O'zbekiston va Qirg'iziston rahbarlarining siyosiy irodasi va qat'iy sa'y-harakatlari natijasida mamlakatlarimiz o'rtasidagi munosabatlar barqaror yuqori sur'atni namoyish etib, o'z tarixidagi eng namunali davrni boshidan kechirayotgani ta'kidlandi.

Tomonlar O'sh shahri va O'zbekiston hududlari o'rtasidagi savdo-iqtisodiy, investitsiyaviy, turizm va madaniy-gumanitar aloqalarni jadallashtirish, qo'shma loyihalarni amalga oshirish va o'zaro tashriflarni amalga oshirish imkoniyatlarini muhokama qildilar. 

O'sh shahar rasmiylari va ishbilarmon doiralari vakillari delegatsiyasining Andijon viloyatiga safarini uyushtirish, O'sh shahrida O'zbekiston va Qirg'iziston chegaraoldi viloyatlari turizm festivali, qo'shma biznes-forumi va ikki mamlakat korxonalari mahsulotlari ko'rgazmasini tashkil etish masalalariga e'tibor qaratildi.

Uchrashuv yakunida O'sh shahar hokimi va O'zbekiston Bosh konsulxonasi o'rtasidagi aloqalarni mustahkamlashga kelishib olindi.