ASHXOBOD, 23-may. /"Dunyo" AA/. O'zbekiston opera san'ati ustalari Ashxobodda bo'lib o'tgan "Jahon musiqasi" xalqaro festivalida ishtirok etdi, deb xabar qilmoqda "Dunyo" AA muxbiri.

Turkmaniston tashabbusi bilan e'lon qilingan "Xalqaro tinchlik va ishonch yili" doirasida Ashxobodda "Jahon musiqasi" xalqaro festivali tashkil etildi. Festivalda, shuningdek, Rossiya, Xitoy, Fransiya, Eron, Armaniston, Ozarbayjon, Qozog'iston, Qirg'iziston va O'zbekistondan taniqli bastakorlar, dirijyorlar, eng yaxshi opera xonandalari va musiqachilari qatnashdi.

Turkmaniston Prezidenti Serdar Berdimuhamedov ishtirokchilarga yo'llagan tabrigida "Jahon musiqasi" xalqaro festivali dunyo xalqlarining madaniy va ma'naviy qadriyatlarini ommalashtirish, madaniyat va san'at namoyandalari o'rtasidagi ijodiy aloqalarni kengaytirishga xizmat qilishiga ishonch bildirdi.

Turkmaniston Davlat madaniyat markazining "Mukamlar" saroyi sahnasida tashkil etilgan konsert dasturida opera san'atining boy turlari, jumladan, dunyoning turli opera maktablari vokal an'analarining nodir namunalari ijro etildi.

E'tiborlisi O'zbekiston san'at ustalarining chiqishlari tomoshabinlarda alohida qiziqish uyg'otdi. Tomoshabinlar Alisher Navoiy nomidagi Davlat akademik katta teatrining yetakchi solistlari Damir Rahmonov va Abdulla Shirinov, "Turkiston" kamera orkestri sozandalarini iliq kutib oldi.

O'zbekiston vakillari dasturidan atoqli o'zbek bastakorlarining operalaridan ariyalar, simfonik aranjirovkadagi xalq kuylari, Yevropa operasining mumtoz asarlari va Sharq romantikasi namunalari o'rin oldi. O'zbekistonlik san'atkorlar tomonidan taqdim etilgan "Maysaraning nayranglari" operasidan "Cho'ponali qo'shig'i" festivalda yuksak baholandi.

"Jahon musiqasi" festivali madaniy birlikning yorqin namoyishiga aylandi. O'zbekiston opera san'ati vakillarining ishtiroki esa o'zbek milliy opera maktabining yuksak saviyasini yana bir bor namoyish etdi.