BUXAREST, 25-may. /"Dunyo" AA/. Ruminiya Tatar demokratik ittifoqi prezidenti Naim Belgin "Dunyo" AA uchun intervyusida O'zbekiston Prezidenti Shavkat Mirziyoyevning 19-21-may kunlari Vengriyaga buyurgan rasmiy tashrifi yakunlari haqidagi fikrlarini bildirdi:

– Tashrif chuqur ramziy va strategik ahamiyatga ega. Bu turkiy davlatlar bilan aloqalarni chuqurlashtirishga intilayotgan Vengriyaning faol yordami bilan qurilgan Markaziy Osiyo va Yevropa Ittifoqi o'rtasidagi ko'prikdir.

Biz kabi jamoalar, ya'ni Ruminiyadagi tatar ozchiligi, Oltin O'rda avlodlari uchun ushbu tashrif Sharq va G'arb o'rtasidagi muloqot XXI asrda ham zarurligini tasdiqlaydi.

O'zbekistonning Budapeshtda bo'lishi turkiy dunyo endi an'anaviy geografik chegaralar bilan cheklanib qolmaganini ko'rsatadi. Yevropadagi turkiy xalqlar, jumladan, tatarlar uchun bu kengroq Yevropa kontekstida madaniy o'ziga xoslikni saqlash va qayta tiklashga yordam beradi.

Bizning xalqlarimiz – saklar, xunlar, xazarlar, o'g'uzlar, qipchoqlar, pecheneglar va boshqalar Yevropada 3 ming yildan ortiq tarixga ega. Biz Sharq va G'arb, Osiyo va Yevropa o'rtasidagi jonli ko'prikmiz, bu dunyolar o'rtasidagi mustahkam bog'liqlikning isbotimiz.

Vengriya diplomatik va madaniy vositachi sifatida harakat qilishi mumkin. U ham Yevropa Ittifoqining institutsional tilini ham turkiy dunyoning tarixiy va madaniy xususiyatlarini tushunadi. Bu ikki tomonlama rol Vengriyani Yevropa ta'limi, ilmiy, energetika va madaniy dasturlariga kirishda O'zbekiston uchun hamkorga aylantiradi.

Diplomatik tashriflar siyosatdan tashqari ta'lim, madaniyat, iqtisodiyot va fuqarolik jamiyati uchun ham hamkorlik uchun eshiklarni ochadi.