BUDAPESHT, 21-oktyabr. /"Dunyo" AA/. Markaziy va Sharqiy Yevropadagi yetakchi sirk arenasi – Budapesht sirki (Fővárosi Nagycirkusz) o'zining yangi ijodiy mavsumini boshladi, deb xabar beryapti "Dunyo" AA muxbiri.

18-oktyabrdan 31-dekabrgacha sirkda aka-uka Grimmlar ertagiga asoslangan va sirk san'ati, musiqa, teatr va jonli vizual ssenografiyani o'zida mujassam etgan "Ona Xolle / Mother Holle / Holle Anyó" shousi bo'lib o'tadi.

E'tiborlisi, ushbu dasturga rejissyor Anvar Aliyev tomonidan o'zbek sirk truppasi ishtirokida sahnalashtirilgan "Aliyev Infiniti" spektakli ham kiritilgan. Truppa dasturdagi eng ajoyib va ​​texnik jihatdan qiyin harakatlardan birini bajarib, vertikal qutbda muvozanatni namoyish etmoqda. O'zbekistonlik san'atkorlarning ishtiroki azaldan xalqaro sahnalarda e'tirof etilgan milliy sirk maktabining yuksak saviyasini yana bir karra tasdiqlaydi.

"Mother Holle" shousi xalqaro loyiha bo'lib, unda O'zbekiston, Vengriya, Ukraina, Rossiya, Xitoy, Niderlandiya, Germaniya sirk san'ati vakillari ishtirok etmoqda. Shou haqiqat, tarbiya, o'sib-ulg'ayish va mehnatsevarlik haqida hikoya qiladi. Ushbu chin insoniy jihatlar sirk, pantomima va musiqa tili orqali tomoshabinlarga yetkaziladi.

"Budapeshtda chiqish qilish biz uchun katta sharaf. Tomoshabinlarning qo'llab-quvvatlashini his qilayaptmiz. Bu yerda o'zbek sirk san'atiga bo'lgan yuqori qiziqishni ko'ryapmiz va bundan keyin ham mamlakatimizni xalqaro sahnalarda namoyish etishda davom etamiz", – dedi truppa rahbari Anvar Aliyev.

Budapesht sirki bir necha yillar davomida mintaqa sirk madaniyatining ramzi bo'lib qolmoqda. O'zbekiston sirk san'ati ustalarining ushbu loyihadagi ishtiroki ijodiy aloqalarni mustahkamlaydi, madaniy diplomatiyani rivojlantiradi, o'zbek sirk maktabining xalqaro miqyosda tan olinishiga xizmat qiladi.