TOSHKENT, 19-iyun. /"Dunyo" AA/. Kecha Oliy Majlis Senatida "Mo'g'uliston – O'zbekiston" parlamentlararo do'stlik guruhi raisi Suxbaatar Erdenebat boshchiligidagi delegatsiya bilan onlayn uchrashuv o'tkazildi, deb xabar qilmoqda "Dunyo" AA muxbiri.

Parlament yuqori palatasi matbuot xizmati ma'lumotiga ko'ra, muloqot davomida O'zbekiston va Mo'g'uliston parlamentlararo do'stlik guruhlari faoliyatining samaradorligini oshirish hamda oliy darajada erishilgan kelishuvlar o'z vaqtida va sifatli bajarilishi ustidan birgalikdagi parlament nazoratini yo'lga qo'yish borasida fikr almashildi.

Shuningdek, O'zbekiston va Mo'g'uliston o'rtasidagi do'stona munosabatlar mustahkam tarixiy asoslarga ega ekanligi hamda o'zaro hurmat va ishonch tamoyillari asosida rivojlanayotgani alohida qayd etildi.

Muloqot yakunida, 2025–2026-yillarga mo'ljallanayotgan parlamentlararo hamkorlik bo'yicha "yo'l xaritasi" loyihasini amalga oshirish yuzasidan aniq vazifalar belgilab olindi.