FRANKFURT-MAYN, 21-sentabr. /Dunyo" AA/. Merzeburg amaliy fanlar universiteti huzuridagi davlat kolleji direktori va Toshkent davlat pedagogika universiteti huzuridagi nemis-o'zbek fakulteti dekani, professor Ming Cheng (Germaniya) "Dunyo" AA uchun intervyusida GFR Federal kansleri Olaf Sholsning O'zbekistonga amalga oshirgan rasmiy tashrifi haqidagi fikrlarini bildirdi:

– Federal kansler Olaf Sholsning shu yil 15-16-sentabr kunlari O'zbekistonga amalga oshirgan tashrifi Germaniya-O'zbekiston munosabatlarini rivojlantirishda muhim qadam bo'lib, O'zbekistonning Germaniya uchun ahamiyati ortib borayotganini ta'kidladi. Toshkent davlat pedagogika universiteti nemis-o'zbek fakultetining faxriy professori va ta'sischi dekani sifatida men ushbu tashrifni ikki tomonlama hamkorlikni yana-da chuqurlashtirish uchun qimmatli imkoniyat deb bilaman.

Kansler Olaf Shols Samarqandga tashrifi chog'ida O'zbekiston Prezidenti Shavkat Mirziyoyev bilan uchrashdi. Germaniya kansleri 22 yil ichida birinchi marta O'zbekistonga tashrif buyurgani uchun bu uchrashuv katta ahamiyatga ega bo'ldi. Ammo bu tashrif shunchaki ramziy ma'no bilan cheklanib qolmaydi. Bu O'zbekistonning Markaziy Osiyodagi strategik va iqtisodiy ahamiyati ortib borayotganini aks ettirdi va ikki davlatning iqtisodiyot, ta'lim va migratsiya kabi sohalardagi hamkorlikni sezilarli darajada kengaytirishga tayyorligini ko'rsatdi.

Federal kansler tashrifining muhim natijalaridan biri o'zbekistonlik mutaxassislarning Germaniyaga immigratsiyasini soddalashtirishga qaratilgan migratsiya kelishuvi bo'ldi. Germaniya va O'zbekiston o'rtasidagi ta'lim va iqtisodiy hamkorlik bilan chambarchas bog'liq inson sifatida bunda har ikki tomon uchun ham katta imkoniyatlarni ko'ryapman. O'zbekiston malakali mutaxassislari soni ortib borayotgani va nemis tilini yaxshi bilishi bilan Germaniya mehnat bozorini to'ldirish, qurilish va xizmat ko'rsatish kabi muhim tarmoqlarda qo'llab-quvvatlash uchun ulkan salohiyatga ega. Shu bilan birga, hamkorlikni chuqurlashtirish bilim va innovatsiyalar almashinuvini ham osonlashtiradi.

Germaniya iqtisodiyoti faqat mutaxassislar migratsiyasida salohiyatni ko'radi. Oltin va mis kabi resurslar tabiiy resurslar sohasida yaqinroq hamkorlik qilish imkoniyatini beradi. Quyosh va shamol kabi qayta tiklanadigan energiya, ayniqsa vodorod ishlab chiqarish kontekstida ham yangi imkoniyatlarni taqdim etadi. Mashinasozlik va texnologik sohalarda, ayniqsa, O'zbekiston infratuzilmasini modernizatsiya qilishda hamkorlikni mustahkamlash uchun salmoqli salohiyat mavjud. Bu loyihalar nemis kompaniyalariga yirik qurilish va logistika loyihalariga hissa qo'shish va uzoq muddatli hamkorlikni mustahkamlash imkonini beradi.

Kansler tashrifining ko'pincha e'tiborga olinmaydigan, lekin juda muhim jihati ta'lim sohasidir. Germaniya-O'zbekiston aloqalarinig mustahkamlanishi nafaqat kasb-hunar darajasida nemis tilini biladigan malakali kadrlarni, balki menejerlar, IT-mutaxassislari yoki muhandislar kabi akademik mutaxassislarni ham talab qiladi, bu esa o'z navbatida O'zbekistonda malakali nemis tili o'qituvchilarini mukammal tayyorlashni taqozo etadi. O'zbekistondagi ilk nemis-o'zbek fakulteti asoschisi sifatida men, ayniqsa, fakultetimiz ushbu ehtiyojlarni qondira olishidan mamnunman.

"Markaziy Osiyo – Germaniya" sammitidan so'ng, ya'ni 18-sentabr kuni nemis-o'zbek fakultetining tantanali ochilishi bo'lib o'tadi. Marosimda ko'plab yuqori martabali mehmonlar, jumladan, Germaniya elchisi Manfred Huterer, O'zbekiston faxriy konsuli Anjela Papenburg, Berlin texnika universiteti professori Torstena Ryolke, shuningdek, O'zbekistonning taniqli vakillari ishtirok etadi.

Umuman olganda, Federal kansler Olaf Sholsning O'zbekistonga tashrifi nafaqat ikki tomonlama munosabatlar uchun tarixiy onlar, balki ta'lim va bilim almashish uchun kuchli signal bo'ldi. Germaniya va O'zbekiston o'rtasidagi munosabatlar keyingi yillarda yangi strategik ahamiyatga ega bo'ldi. Prezident Shavkat Mirziyoyevning 2019-yil yanvar oyida Germaniyaga, Germaniya Prezidenti Frank-Valter Shtaynmayerning 2019-yil may oyida O'zbekistonga javob tashriflari turli sohalardagi hamkorlikni mustahkamlash uchun mustahkam zamin yaratdi. Bundan tashqari, Prezident Shavkat Mirziyoyev va kansler Olaf Shols 2023-yilning may oyida Germaniyada, shuningdek, 2023-yil sentyabr oyida bo'lib o'tgan birinchi "Markaziy Osiyo – Germaniya" sammitida uchrashib, o'sib borayotgan strategik sheriklikni yana-da mustahkamlash yo'llarini muhokama qildilar. Shu nuqtai nazardan, Federal kansler Olaf Sholsning joriy tashrifi nafaqat diplomatik va iqtisodiy munosabatlarni, balki ta'lim sohasidagi sheriklikni yana-da chuqurlashtirish uchun ham muhim qadamdir.