TYUMEN, 29-sentyabr. /"Dunyo" AA/. O'zbekiston Bosh konsulxonasi xodimlari ko'magida Rossiyaning Tyumen viloyatida mushkul ahvolda qolgan hamyurtlarimizga amaliy yordam ko'rsatildi, deb xabar bermoqda "Dunyo" AA muxbiri.

Diplomatik vakolatxonadan olingan ma'lumotga ko'ra, vatandoshlarimiz E.O., I.D. va S.O. Bosh konsulxonaga qilgan murojaatida Tyumen viloyatidagi korxonada ishlayotgan davri uchun oylik maoshlari to'lab berilmayotganini ma'lum qilgan va to'lovlarni undirishda amaliy yordam so'ragan.

Korxona rahbari bilan olib borilgan muloqotlar natijasida, haqiqatdan ham ikki nafar yurtdoshimizning oylik maoshi to'lanmagani va fuqarolik pasporti olib qo'yilgani ma'lum bo'ldi.

Muzokaralar natijasida hamyurtlarimizning murojaatlari ijobiy hal etish yuzasidan kelishuvga erishildi.

Jumladan, O'zbekiston fuqarolarining pasportlari qaytarib berildi hamda ularning ikki oylik maoshlari to'landi.