TOSHKENT, 21-iyun. /"Dunyo" AA/. O'zbekiston tashqi ishlar vaziri Baxtiyor Saidov Istanbul shahriga tashrifi davomida Afg'oniston tashqi ishlar vaziri vazifasini bajaruvchi Mavlaviy Amir Xon Muttaqiy bilan uchrashdi, deb xabar qilmoqda "Dunyo" AA muxbiri.

"Afg'oniston tashqi ishlar vaziri vazifasini bajaruvchi Mavlaviy Amir Xon Muttaqiy bilan samarali suhbat o'tkazdik, – deb yozdi O'zbekiston TIV rahbari o'zining telegram-kanalida. – Muloqot chog'ida O'zbekiston–Afg'oniston ikki tomonlama munosabatlarining dolzarb mavzularini muhokama qilib, iqtisodiy hamkorlikni mustahkamlash, qo'shma infratuzilma va savdo loyihalarini amalga oshirishga alohida e'tibor qaratdik. O'zbekiston Afg'onistonning mintaqaviy va global ta'minot tizimlariga integratsiyalashuvini qo'llab-quvvatlashga sodiq qoladi, bu esa mintaqada uzoq muddatli barqarorlik va izchil taraqqiyotni ta'minlashning kalitidir".