TOSHKENT, 5-dekabr. /“Dunyo” AA/. O‘zbekiston tashqi ishlar vaziri Baxtiyor Saidov kecha Vena shahrida “Markaziy Osiyo – Shimoliy Yevropa” yangi formatining birinchi uchrashuvida ishtirok etdi, deb xabar bermoqda “Dunyo” AA muxbiri.

“Markaziy Osiyo – Shimoliy Yevropa” yangi formatidagi ilk uchrashuvni o‘tkazishdan mamnunmiz, – deb yozdi O‘zbekiston TIV rahbari o‘zining telegram-kanalida. – Ushbu muloqot joriy yil Samarqandda bo‘lib o‘tgan va hamkorligimizni strategik sheriklik darajasiga ko‘targan “Markaziy Osiyo – Yevropa Ittifoqi” sammiti natijalarining mantiqiy davomi sifatida tashkil etildi.

Har ikki mintaqaning o‘zaro hamkorlikni chuqurlashtirish uchun ulkan, hali to‘liq ishga solinmagan salohiyatga ega ekanini taʼkidladik. Hamkorligimizni kengaytirish va uni aniq, istiqbolga yo‘naltirilgan tashabbuslar bilan boyitish vaqti keldi, deb hisoblaymiz”.

Uchrashuvda Shimoliy Yevropa mamlakatlari – Islandiya, Daniya, Norvegiya, Shvetsiya va Finlyandiya TIV rahbarlari ishtirok etdi.