TOSHKENT, 16-iyul. /"Dunyo" AA/. O'zbekiston tashqi ishlar vaziri Baxtiyor Saidov bugun Tyanjin shahrida Xitoy Kommunistik partiyasi Markaziy qo'mitasi Siyosiy byurosi a'zosi, tashqi ishlar vaziri Van I bilan uchrashdi, deb xabar qilmoqda "Dunyo" AA muxbiri.

"Xitoy Xalq Respublikasi Kommunistik partiyasi Markaziy qo'mitasi Siyosiy byurosi a'zosi, tashqi ishlar vaziri Van I janoblari bilan uchrashishdan doimo mamnunmiz, – deb yozdi O'zbekiston TIV rahbari o'zining  telegram-kanalida. – Uchrashuvimiz davomida o'zaro manfaatli iqtisodiy aloqalarni mustahkamlash, mintaqaviy bog'liqlikni kuchaytirish, barqarorlikni ta'minlash va ko'p tomonlama hamkorlik orqali umumiy maqsadlarimizga erishish yo'llarini muhokama qildik.

O'zbekiston va Xitoy o'rtasidagi har tomonlama strategik sheriklik munosabatlarini mustahkamlashga yo'naltirilgan harakatlarimiz xalqlarimiz manfaatlariga xizmat qiladi".

Eslatib o'tamiz, O'zbekiston TIV rahbari Baxtiyor Saidov 15-iyul kuni Tyanjin shahrida bo'lib o'tgan ShHT Tashqi ishlar vazirlari kengashining navbatdagi yig'ilishida ishtirok etdi.