ПЕКИН, 30 август. /"Дунё" АА/. Хитой эксперт ва ишбилармон доиралари вакиллари "Дунё" АА учун интервьюсида Ўзбекистон давлат мустақиллигининг 34 йиллиги муносабати билан мамлакатимиз халқига ўзининг байрам қутловларини йўлладилар:

Ван Бо, "CАМC Engineering" компанияси раиси 

– Бу йил Ўзбекистон мустақилликка эришганига 34 йил тўлади ва Янги Ўзбекистонни барпо этиш йўлида жаҳон миқёсида эътироф этилган ютуқларнинг муҳим босқичи сифатида нишонланади. 

Компаниямиз номидан Ўзбекистон халқига энг самимий табрикларимни йўллашдан мамнунман. Сўнгги йилларда мамлакатингиз билан ҳамкорликда сезиларли натижаларга эришдик.

Биз Ўзбекистон Президенти Шавкат Мирзиёев раҳбарлигида давлатингиз томонидан иқтисодий ислоҳотлар, бозорларни очиш ва ижтимоий тараққиёт соҳасида эришилган ажойиб ютуқларга гувоҳ бўлдик.

Республиканинг умумий ишбилармонлик муҳити яхшиланишда давом этмоқда, унинг халқаро инвестициялар учун жозибадорлиги ошиб бормоқда. Ўзбекистон минтақавий ва глобал миқёсида тобора ижобий таъсир кўрсатмоқда.

"CАМC Ўзбекистон билан атроф-муҳитни муҳофаза қилиш, энергетика, янги инфратузилма ва замонавий саноат парклари каби соҳаларда муҳим ҳамкорлик натижаларига эришди.

Компаниямиз мамлакатларимиз ўртасидаги иқтисодий ва савдо ҳамкорликни чуқурлаштириш, алоқаларни мустаҳкамлашга ўз ҳиссасини қўшмоқда.

Хитой ва Ўзбекистон ўртасидаги дўстлик ришталари абадий бўлишини, янги даврда ҳар томонлама қулай ва стратегик ҳамкорлигимиз янги саҳифа очишини тилайман.

Су Чан: Хитой ижтимоий фанлар академиясининг Россия, Шарқий Европа ва Марказий Осиё институти етакчи илмий ходими: 

 – Мен Ўзбекистон халқини Мустақилликнинг 34 йиллиги билан самимий табриклайман.

Бугун Ўзбекистон сиёсий ва иқтисодий барқарорлик, миллатлараро тотувлик борасида дунёда алоҳида ўрин тутади.

Ўзбекистоннинг иқтисодий ривожланиши жуда тез суръатлар билан давом этмоқда. Ўзбекистон саноат, қишлоқ хўжалиги, энергетика ва юқори технологиялар соҳаларида жуда жадал ривожланаётганини кўрдим. 

Мен ўтган йили Ўзбекистонда бўлдим. Мамлакатингизда шаҳар ва қишлоқ жойларда, жумладан Фарғона водийсида жуда катта ўзгаришлар юз берганини ўз кўзим билан кўрдим. Юртингизнинг халқаро нуфузи кундан-кунга ошиб бормоқда. Бунда албатта, Ўзбекистон Президенти Шавкат Мирзиёевнинг иқтисодий ислоҳотларга, мамлакатингизда хавфсизлик ва барқарорликни сақлашга қўшган улкан ҳиссаси жуда муҳим ўрин тутади. 

Ишонаманки, Ўзбекистон жуда порлоқ истиқболга эга. Давлатингизнинг халқаро ва минтақавий иқтисодий ҳамкорлик жараёнидаги муҳим ўрни мустаҳкамланиб боради. 

Барқарор ва ривожланаётган Ўзбекистон Марказий Осиё минтақаси ривожига катта ҳисса қўшмоқда. Хитой ва Ўзбекистон ўртасидаги муносабатлар ривожланиб, ҳамкорлигимиз мустаҳкамланиб бормоқда.

Чэнь Юйжун, Хитой Ташқи ишлар вазирлиги ҳузуридаги Хитой замонавий халқаро муносабатлар академиясининг етакчи эксперти:

– Ўзбекистон турли соҳаларда ёрқин муваффақиятларга эришаётганининг гувоҳи бўлмоқдамиз.

Ўзбекистоннинг иқтисодий юксалиши сўнгги йилларда жуда жадал кечмоқда, турли соҳаларда катта ижобий ўзгаришлар содир бўлди. Одамларнинг турмуш даражаси ошиб бормоқда. Шаҳарларингиз жуда гўзал қиёфага эга бўлиб бормоқда. Йилдан-йилга янги бинолар, заводлар, йирик ишлаб чиқариш корхоналари барпо этилмоқда. 

Шунингдек, давлатингиз раҳбари томонидан қўшни мамлакатлар билан алоқаларни мустаҳкамлашга катта эътибор қаратилмоқда. Дўст Ўзбекистон халқига янги ютуқлар тилайман.

И Чжэньли, Хитой ижтимоий фанлар академиясининг Россия, Шарқий Европа ва Марказий Осиё институти директорининг ўринбосари:

– Бизнинг институт Марказий Осиё мамлакатлари, хусусан, Ўзбекистонни ўрганишга катта эътибор қаратади. Сўнгги йилларда биз мамлакатингизнинг кўплаб илмий-тадқиқот институтлари, университетлари, таҳлилий марказлари билан жуда муҳим тадбирлар ва алмашинувларни ўтказдик. 

Ўзбекистон Президенти Шавкат Мирзиёев бошчилигида мамлакатда турли соҳаларда кўплаб ислоҳотлар амалга оширилмоқда ва ажойиб натижаларга эришилмоқда.

Ўзбекистоннинг ички иқтисодий ривожланиши жадал суръатлар билан ўсмоқда. 2024 йилда ЯИМ ўсиш суръати 6 фоиздан юқори кўрсаткичга эга бўлди. Бу айни вақтда дунёдаги ўртача ўсиш суръатларидан икки баравар тездир. 

Ўзбекистоннинг сўнгги йиллардаги саъй-ҳаракатлари ва ташаббуслари Марказий Осиё тараққиётига катта ҳисса қўшди. 

Лю Хуацин, Хитой Савдо вазирлигининг халқаро ҳамкорлик академияси Евроосиё институти директори:

– Мен асосан Хитойнинг хорижий мамлакатлар билан иқтисодий ва савдо ҳамкорлигининг муҳим масалаларини ўрганаман. 

Мамлакатларимиз ўртасидаги ушбу соҳалардаги ҳамкорлик алоқалари катта истиқболга эга бўлиб, хозирда ҳар томонлама ривожланиб бормоқда. Давлатларимиз ўртасидаги савдо айланмаси ҳажми ҳам ўсиб бормоқда. Хитой-Қирғизистон-Ўзбекистон темир йўли қурилиши ҳам ушбу йўналишга ижобий таъсир кўрсатади. 

Ўзбекистонда Хитой капитали иштирокидаги корхоналарнинг сони ортиб бормоқда. Хитой инвестициялари мамлакатингизда қурилиш, транспорт, янги энергия воситалари, қишлоқ хўжалиги ва автомобилсозлик каби йўналишларга қаратилмоқда. 

Бу йил Ўзбекистон Мустақиллигига 34 йил тўлади. Ушбу муҳим сана арафасида Ўзбекистон халқига янги марралар ва улкан ютуқлар тилайман. Ишонаманки, мамлакатларимиз ўртасидаги алоқалар янада ривожланиб, халқларимиз фаровонлигига ҳисса қўшиб боради.

Чжан Цин, Юннан "ШҲТ" Маданият ва спорт компанияси раҳбари:

– Мамлакатингиз мислсиз улкан ютуқларни қўлга киритмоқда. Хорижий мамлакатлар билан ҳамкорлик алоқалари ҳам кенгайиб бормоқда. 

Ўзбекистон ва Хитой ўртасидаги алоқалар ҳам мустаҳкамланиб бормоқда. Хитойлик инвесторларнинг сармоя киритишга бўлган қизиқиши ортиб бормоқда. Мамлакатларимиз ўзаро манфаатли лойиҳаларни амалга оширмоқда. 

Ўзбекистон бой маданияти, тарихи ва сайёҳлик имкониятлари билан хитойлик сайёҳларни ўзига жалб этмоқда. Бу эса халқларни янада якинлаштирмоқда. Умид қиламанки, ҳамкорлик натижасида иккала мамлакат ҳам янада гуллаб-яшнайди.

Хитойнинг "Longi Green Energy Technology" компанияси вакили Эмми Ван:

– Бизнинг компаниямиз Ўзбекистонда кўп йиллардан буён ўз фаолиятини юритиб келмоқда.

Ўзбекистонда маҳаллийлаштирилган жамоамиз, профессионал ўқитувчиларимиз ва яхши жиҳозланган ўқув марказимиз мавжуд. Компаниямиз мамлакатингиз билан "яшил" энергетика соҳасида ҳамкорликни ўрнатган.

Компаниямиз Ўзбекистон Президенти томонидан илгари сурилган Тошкент яшил водород лойиҳасини қўллаб-қувватламоқда. Бу Марказий Осиёдаги биринчи йирик яшил водород лойиҳасидир.

Биз охирги бир неча йил ичида маҳаллий бош пудратчилар учун қуёш энергетикаси муҳандисларини ҳам тайёрлашда иштирок этдик. Ҳозиргача биз 100 дан ортиқ маҳаллий компанияларнинг 1000 дан ортиқ муҳандисларини ўқитдик. 

Ишонамизки, Ўзбекистон яқин келажакда нафақат энергия билан ўзини-ўзи таъминлашга эришади, балки яшил энергия марказига айланади.