ВЛАДИВОСТОК, 29 август. /"Дунё" АА/. Ўзбекистон давлат мустақиллигининг 34 йиллиги муносабати билан Россиянинг Владивосток шаҳрида спортнинг мини-футбол тури бўйича халқаро турнир ташкил этилди, деб хабар қилмоқда "Дунё"АА мухбири.

Ўзбекистон Бош консулхона томонидан Приморск ўлкаси ҳукумати билан биргаликда ўтказилган турнирда Ўзбекистон, Россия, Хитой, Жанубий Корея, Япония, Вьетнам, Ҳиндистон, Тожикистон, Қирғизистон ва Озарбайжон фуқароларидан ташкил топган жами 10 та жамоа иштирок этди.

Мусобақанинг тантанали очилиш маросимида сўзга чиққан бош консул Юсуп Кабулжанов ватандошларимизни Ўзбекистон мустақиллигининг 34 йиллиги билан табриклаб, мусобақа иштирокчиларига омад тилади. Шунингдек, чемпионатни юқори савияда ташкил қилишда яқиндан ёрдам кўрсатган Приморск ўлкаси ҳукумати вакилларига миннатдорлик билдирилди.

Турнир давомида ўтказилган ўйинлар муросасиз ва курашларга бой тарзда кечди. Мусобақалар якунида ғолиб ва совриндор бўлган жамоаларга кубок, медаль, диплом ва бошқа қимматбаҳо совғалар билан топширилди.

Мусобақадан сўнг, иштирокчилари ва мухлислар учун ўзбекона дастурхон ёзилиб, палов улашилди.