АЛ-КУВАЙТ, 7 май. /"Дунё" АА/. Ўзбекистон элчиси Аюбхон Юнусов Кувайтнинг "Suma Fruits International" компаниясига ташриф буюриб, менежерлар Муҳаммад Ҳусайн ва Сулаймон ал-Ҳамад билан учрашув ўтказди, деб хабар бермоқда "Дунё" АА мухбири.

Суҳбат аввалида Кувайт вакиллари мамлакатимизда амалга оширилаётган кенг кўламли ўзгаришлар, ўзбек маҳсулотларининг экспорти учун тақдим этилаётган имтиёзлар, хорижий импортёрлар учун яратилган қулайликлар билан таништирилди.

Кувайт томони Ўзбекистонда етиштирилган мева-сабзавотларини сотиб олиш учун ўзбек компаниялари билан ҳамкорлик қилишга тайёр эканини маълум қилди.

Томонлар, шунингдек, Ўзбекистондан мева-сабзавотларни Кувайтга олиб келиш бўйича энг арзон ва қулай транспорт-логистика йўллари хусусида ҳам фикр алмашдилар.

Ўзбекистон элчиси ташриф давомида "Suma Fruits International" компаниясида ҳўл мева ва сабзавотларни сақлаш учун яратилган шароитлар билан танишди.

Учрашув якунида "Suma Fruits International" компанияси ва Ўзбекистон компаниялари ўртасида музокаралар ўтказиш тўғрисида келишиб олинди.